ភ្នំពេញ: ក្នុងកិច្ចប្រជុំពិភាក្សារយៈពេល ៣ ម៉ោង ៣០ នាទី ចាប់ពីម៉ោង ៩ ព្រឹកថ្ងៃទី១៥ ខែមករា ឆ្នាំ២០១៤ នៅវិមានសន្តិភាព រវាងលោក ស៊ូយា ស៊ូប៊ែរឌី និងសម្តេចហ៊ុនសែន ព្រមទាំងថ្នាក់ដឹកនាំជាន់ខ្ពស់រដ្ឋាភិបាលជាច្រើនទៀត គឺសម្តេចហ៊ុនសែន បានសុំពឹង និងស្នើឲ្យលោកស៊ូប៊ែរឌី បញ្ចុះបញ្ចូលគណបក្សសង្គ្រោះជាតិ ឲ្យចូលរួមក្នុងរដ្ឋសភា ដើម្បីប្រជុំដោះស្រាយបញ្ហានយោបាយនៅកម្ពុជា នាពេលសព្វថ្ងៃ។ នេះបើតាមលោក ឱម យ៉ិនទៀង ទេសរដ្ឋមន្ត្រី ដែលបាននាំពាក្យពីលទ្ធផលនៃកិច្ចប្រជុំ ប្រាប់ក្រុមអ្នកកាសែត។
លោក ឱម យ៉ិនទៀង បានលើកឡើងថា សម្តេចហ៊ុនសែន បានបញ្ជាក់ទៅកាន់លោកស៊ូប៊ែរឌី ថា រាជរដ្ឋាភិបាល គណបក្សប្រជាជនកម្ពុជា នៅតែរក្សាទ្វារចរចាបើកចំហរ និងខិតខំថ្នាក់ថ្នមសភាពការណ៍ ដើម្បីចរចា សម្រុះសម្រួលជាមួយគណបក្សសង្គ្រោះជាតិ។ ប៉ុន្តែលោក បានព្រមានថា កុំឲ្យតែឈានទៅដល់ថ្នាក់ផ្តួលរំលំ នោះរាជរដ្ឋាភិបាល មិនអាចអត់អោនឲ្យបានទេ។
អំពីលទ្ធផលនៃកិច្ចប្រជុំពិភាក្សាដោយបិទទ្វារ រវាង ហ៊ុនសែន និងលោកស៊ូប៊ែរឌី នៅព្រឹកមិញនេះ គឺលោក ស៊ូប៊ែរឌី បានលើកឡើង ៥ ចំណុច រួមមាន៖ ទី១-មើលស្ថានការណ៍សិទ្ធិមនុស្ស នៅកម្ពុជា ទី២-តាមដានអនុសាសន៍របស់លោក កន្លងមក ថាតើរដ្ឋាភិបាល ទទួលយកចំនុចណាខ្លះ ឬក៏មិនទទួលយកចំណុចណាខ្លះ ទី៣-ចង់ដឹងពីការកែទម្រង់ធំៗ របស់រដ្ឋាភិបាល ដូចជា ប្រព័ន្ធតុលាការ សភា ទី៤-ស្វែងយល់ពីជំហររបស់រដ្ឋាភិបាល ពាក់ព័ន្ធនឹងការបង្កើតស្ថាប័នថ្នាក់ជាតិ ដែលទទួលបន្ទុកសិទ្ធិមនុស្ស និងទី៥-ការបារម្ភខ្លះរបស់លោក លើបច្ចុប្បន្នភាពកម្ពុជា។ក្នុងកិច្ចប្រជុំ សម្តេច ហ៊ុនសែន ក៏បានប្រាប់ពីលទ្ធផលនៃកំណែទម្រង់ជាច្រើនរបស់រាជរដ្ឋាភិបាល ដូចជា កំណែទម្រង់តុលាការ ដែលនៅត្រីមាសទី១ ក្នុងឆ្នាំ២០១៤ មានពង្រាងច្បាប់ ៣ ពាក់ព័ន្ធនឹងតុលាការ នឹងអាចយកមកដាក់នៅគណៈរដ្ឋមន្ត្រី រួមមាន សេចក្តីព្រាងច្បាប់លក្ខន្តិកៈអង្គចៅក្រម ការរៀបចំ និងការប្រព្រឹត្តទៅរបស់តុលាការ រួមទាំងវិសោធនកម្មលើច្បាប់ឧត្តមក្រុមប្រឹក្សាអង្គចៅក្រម ជាដើម។
ក្នុងនោះ ហ៊ុនសែន ក៏បានប្រាប់លោកស៊ូប៊ែរឌី អំពីគម្រោងបង្កើតតុលាការសាលាឧទ្ធរណ៍ច្រើនទៀត តាមខេត្ត តុលាការការងារ និងតុលាការពាណិជ្ជកម្ម ជាដើម។ រីឯកំណែទម្រង់លើការងារបោះឆ្នោតវិញ គឺលោកឱមយ៉ិនទៀង បានអះអាងថា មិនត្រឹមតែកែទម្រង់លើគជបទេ តែជាការកែទម្រង់ទូលំទូលាយ ដូចជា ពេលវេលា របៀបចុះឈ្មោះ ជាដើម ដើម្បីកុំឲ្យមានរឿងរ៉ាវ កើតឡើងរៀងរាល់ពេលបោះឆ្នោត ៥ ឆ្នាំម្តង តទៅទៀត។
អំពីការចាប់ឃុំខ្លួនបាតុករ ២៣ នាក់ រួមទាំងលោកវនពៅ ត្រូវបានលោក ឱម យ៉ិនទៀង អះអាងថា លោកស៊ូប៊ែឌី បានជម្រាបជូនសម្តេចហ៊ុនសែន អំពីលទ្ធភាពនៃការធានាអ្នកទាំងនោះ ឲ្យនៅក្រៅឃុំជាបណ្តោះអាសន្ន ដោយតម្កល់ប្រាក់នោះ គឺ ហ៊ុនសែន បានតបទៅវិញថា ជារឿងរបស់រដ្ឋមន្ត្រីក្រសួងយុត្តិធម៌ និងក្រសួងមហាផ្ទៃ។
