ប្រភពពីមន្ត្រីអាជ្ញាធរនិងសមត្ថកិច្ច ក្នុងសង្កាត់ផ្សារកណ្ដាល ក្រុង ប៉ោយប៉ែត ខេត្តបន្ទាយមានជ័យ បានឲ្យដឹងថា ការដែលលោក ពៅ រិទ្ធី យក ទីតាំងដីកម្មសិទ្ធិរបស់ខ្លួន បើកច្រករបៀងយ៉ាងគឃ្លើន ផ្ទុយពីបទបញ្ជារបស់ថ្នាក់ដឹកនាំ ក្រសួងមហាផ្ទៃ គឺមានការឃុបឃិត បើកដៃពីសំ ណាក់លោក ហាំ វណ្ណៈ ដែលជាមេបញ្ជាការនគរបាលវរការពារព្រំដែន លេខ៨៩១ ផងដែរ។ ប្រសិនបើគ្មាន ការឃុបឃិតបើកដៃពីសំណាក់លោក ហាំ វណ្ណៈ ដែលជាចៅហ្វាយនាយទេនោះគឺលោក ពៅ រិទ្ធី មេបញ្ជាការរងនគរបាលវរការពារព្រំដែនលេខ៨៩១ មិនហ៊ានយកទីតាំងដីកម្មសិទ្ធិផ្ទាល់ខ្លួនជាប់អូរព្រំដែនខ្មែរ-សៀម បើកច្រករបៀងយ៉ាងរលូនដូចសព្វថ្ងៃនេះទេ។ ដូច្នេះលោក សួន បវរ អភិបាលខេត្តបន្ទាយមានជ័យ គួរពិនិត្យមើលបញ្ហានេះផងព្រោះលោក អាត់ ខែម ស្នងការនគរបាលខេត្តបន្ទាយមានជ័យ កំពុងរក្សាភាពស្ងៀមស្ងាត់ដើម្បីចាំទទួលផលប្រយោជន៍ពីកូនចៅក្រោមឱវាទយ៉ាងសុខស្រួល។
ប្រជាពលរដ្ឋរស់នៅក្នុងភូមិគីឡូម៉ែត្រលេខ៤ សង្កាត់ផ្សារកណ្ដាល ក្រុងប៉ោយប៉ែត បានឲ្យដឹងថា តាមព្រំដែនខ្មែរ-សៀម ក្នុងមូលដ្ឋានពួកគាត់មានច្រករបៀងខុសច្បាប់មួយកន្លែងកំពុងដំណើរការយ៉ាងរលូន ហើយមន្ត្រីអាជ្ញាធរមូលដ្ឋាននិងសមត្ថកិច្ចក្រុងប៉ោយប៉ែត មិនហ៊ានប៉ះពាល់នោះទេ។ ប្រភពបានឲ្យដឹងថា នៅលើទីតាំងដីមួយកន្លែងជាប់អូរព្រំដែនកម្ពុជា-សៀម ដែលជាដីកម្មសិទ្ធិរបស់លោក ពៅ រិទ្ធី ហៅខ្នា មេបញ្ជាការរងវរនគរបាលការពារព្រំដែនគោកលេខ៨៩១ ត្រូវគេបើកច្រករបៀងខុសច្បាប់។ ច្រករបៀងនោះត្រូវបានគេដឹងថា ស្ថិតនៅក្រោមការគ្រប់គ្រងរបស់លោក ពៅ រិទ្ធី តែម្តងហើយមានឈ្មួញនាំចូលនាំចេញទំនិញយ៉ាងពេញបន្ទុក និងមានការឃុបឃិតឲ្យពលរដ្ឋខ្មែរឆ្លងដែនចូលទឹកដីសៀមតាមច្រករបៀងនេះទៀតផង។
គួររំលឹកដែរថាថ្នាក់ដឹកនាំក្រសួងមហាផ្ទៃ បានចេញបទបញ្ជាឲ្យអាជ្ញាធរនិងសមត្ថកិច្ចខេត្តបន្ទាយមានជ័យ លុបបំបាត់ច្រករបៀងទាំងអស់ជាប់ព្រំដែនខ្មែរ-សៀម ដើម្បីពង្រឹងសន្តិសុខតាមព្រំដែន និងទប់ស្កាត់បទល្មើសឆ្លងដែនប្រកបដោយប្រសិទ្ធភាព។ ក៏ប៉ុន្តែមេបញ្ជាការនគរបាលវរការពារព្រំដែនលេខ៨៩១ លោក ហាំ វណ្ណៈ ក៏ដូចជាលោក ពៅ រិទ្ធី ដែលជាមេបញ្ជាការរងអង្គភាពនេះ មិនអនុវត្តន៍តាមបទបញ្ជារបស់ថ្នាក់ដឹកនាំក្រសួងមហាផ្ទៃនោះឡើយ ហើយកំពុងលួចបើកច្រករបៀងក្នុងភូមិគីឡូម៉ែត្រលេខ៤ សង្កាត់ផ្សារកណ្ដាល ក្រុងប៉ោយប៉ែត យ៉ាងគឃ្លើន។ តាមរយៈការបើកច្រករបៀងនៅភូមិគីឡូម៉ែត្រលេខ៤ ឲ្យឈ្មួញនាំចេញនាំចូលទំនិញតាមច្រកនេះ ក៏ដូចជាការឃុបឃិតឲ្យពលករខ្មែរឆ្លងកាត់ខុសច្បាប់ចូលទឹកដីសៀម គឺលោក ពៅ រិទ្ធី អាចប្រមូលលុយបានយ៉ាងច្រើនយកទៅចែកគ្នាធ្វើមានធ្វើបានជាមួយលោក ហាំ វណ្ណៈ ដែលជាចៅហ្វាយនាយ។ ទន្ទឹមនឹងនេះក៏អាចមានការបែងចែកផលប្រយោជន៍មួយផ្នែកធំដល់លោក អាត់ ខែម ស្នងការនគរបាលខេត្តបន្ទាយមានជ័យ ដែលល្បីល្បាញខាងប្រព្រឹត្តអំពើពុករលួយ ?បឋម
