ប្រភពពីមន្ត្រីគយដែលស្និទ្ធ នឹងលោក ទី ប៊ុនឡង់ ប្រធានការិយាល័យ គយច្រកទ្វារអន្តរជាតិព្រំ បានបង្ហើបឲ្យដឹង ថា ទំនិញដែល ឈ្មួញធំៗ នាំចូលតាមច្រកនេះគឺបង់ពន្ធជូន រដ្ឋត្រឹម៣០ទៅ៤០ភាគរយ ប៉ុណ្ណោះ ហើយក្រៅពីនេះ គឺក្រុមឈ្មួញឃុបឃិត បែងចែកផល ប្រយោជ ន៍ លើតុ ក្រោមតុជាមួយលោក ទី ប៊ុនឡង់ តែម្តង។ ទន្ទឹមនឹងនេះលោក ទី ប៊ុនឡង់ និងបក្ខ ពួកបែរជាគាបសង្កត់យ៉ាងខ្លាំង ទៅលើអាជីវករតូចតាចនិងប្រជាពលរដ្ឋដែលរកស៊ីនាំចូលទំនិញជាប្រភេទចំណីអាហារបន្លែផ្លែឈើបន្តិចបន្តួចពីទឹកដីសៀមចូលទឹកដីខ្មែរដើម្បីបានប្រាក់កម្រៃចិញ្ចឹមជីវិត។ ហេតុនេះហើយទើបកន្លងមកអាជីវករតូចតាចនិងប្រជាពលរដ្ឋប្រមូលផ្ដុំគ្នាតវ៉ាជាបន្តបន្ទាប់នៅមុខការិយាល័យគយច្រកទ្វារអន្តរជាតិព្រំ ហើយលាតត្រដាងជាសាធារណៈនៅអំពើពុករលួយរបស់លោក ទី ប៊ុនឡង់ និងបក្ខពួក។ ដូច្នេះលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ មិនគួរបណ្ដែតបណ្ដោយឲ្យលោក ទី ប៊ុនឡង់ ប្រធានការិយាល័យគយច្រកទ្វារអន្តរជាតិព្រំ និងលោក សំ សុវណ្ណារិទ្ធ ប្រធានសាខាគយខេត្តប៉ៃលិន ឃុបឃិតគ្នាប្រព្រឹត្តអំពើពុករលួយយ៉ាងគឃ្លើន។
ប្រភពពីមន្ត្រីបម្រើការងារនៅច្រកទ្វារអន្តរជាតិព្រំ ខេត្តប៉ៃលិន បានឲ្យដឹងថា ក្នុងរយៈពេលប្រមាណ៣ខែចុងក្រោយនេះលោក ទី ប៊ុនឡង់ ប្រធានការិយាល័យគយច្រកទ្វារអន្តរជាតិព្រំ និងបក្ខពួកកំពុងប្រព្រឹត្តអំពើពុករលួយតាមច្រើនរូបភាពដោយគ្មានញញើតអ្វីទាំងអស់។ ប្រភពបានឲ្យដឹងទៀតថា លោក ទី ប៊ុនឡង់ និងបក្ខពួកឃុបឃិតឲ្យឈ្មួញធំៗនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់កាន់តែច្រើនឡើងៗដើម្បីជាថ្នូរនឹងផលប្រយោជន៍ ហើយមិនខ្វល់ពីការរិះគន់អ្វីទាំងអស់ព្រោះអាងមានខ្នងបង្អែករឹងមាំនៅក្នុងអគ្គនាយកដ្ឋានគយនិងរដ្ឋាករកម្ពុជា។ ជាងនេះទៅទៀតការដែលលោក ទី ប៊ុនឡង់ ប្រធានការិយាល័យគយ ហ៊ានប្រើអំណាចប្រព្រឹត្តអំពើពុករលួយយ៉ាងគឃ្លើន គឺដោយសារមានការសម្របសម្រួលជ្រោមជ្រែងពីសំណាក់លោក សំ សុវណ្ណារិទ្ធ ប្រធានសាខាគយខេត្តប៉ៃលិន ផងដែរ។
មន្ត្រីគយនិងភ្នាក់ងារគយនៅក្នុងខេត្តប៉ៃលិន មួយចំនួនបានអំពាវនាវឲ្យលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ចាត់វិធានការទប់ស្កាត់អំពើពុករលួយរបស់លោក ទី ប៊ុនឡង់ ប្រធានការិយាល័យគយច្រកទ្វារអន្តរជាតិព្រំខ្លះផង ព្រោះបច្ចុប្បន្នលោក ទី ប៊ុនឡង់ និងបក្ខពួកកំពុងឃុបឃិតគ្នាប្រព្រឹត្តអំពើពុករលួយដោយគ្មានញញើតអ្វីទាំងអស់។ ប្រភពបានឲ្យដឹងទៀតថា ការដែលលោក ទី ប៊ុនឡង់ ហ៊ានប្រើតួនាទីនិងអំណាចប្រព្រឹត្តអំពើពុករលួយយ៉ាងក្រអឺតក្រទម គឺដោយសារអាងមានខ្នងបង្អែកធំជាងលោក គុណ ញឹម ដែលជាអគ្គនាយកនៃអគ្គនាយកដ្ឋានគយនិងរដ្ឋាករកម្ពុជា ទៅទៀត។ ទន្ទឹមនឹងនេះក៏មានសេចក្ដីអំពាវនាវពីមន្ត្រីគយនិងភ្នាក់ងារគយនៅខេត្តប៉ៃលិន ជំរុញឲ្យលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ បើកការស៊ើបអង្កេតទៅលើរឿងអាស្រូវពុករលួយរបស់លោក ទី ប៊ុនឡង់ មេគយច្រកទ្វារអន្តរជាតិព្រំ ឲ្យបានស៊ីជម្រៅនិងចាត់វិធានការទប់ស្កាត់ប្រកបដោយប្រសិទ្ធភាព។បឋម
