ភ្នំពេញ៖ កាលពីដើមខែកក្កដា ឆ្នាំ២០១២កន្លងទៅ «រាជធានីភ្នំពេញ» បានទទួលវិញ្ញាបនបត្រ ចំណាត់ថ្នាក់លេខ១ ផ្នែកប្រសិទ្ធភាព នៃការគ្រប់គ្រង នៅប្រទេសសិង្ហបុរី នៅក្នុងចំណោមទីក្រុងចំនួន ១០០ លើពិភពលោក ដែលបានចូលរួមប្រកួតប្រជែង ដណ្តើមយករង្វាន់ World Cities Submit Mayors Forum 2012 នៅប្រទេសសិង្ហបុរី ។ ប៉ុន្តែមានប្រជាពលរដ្ឋ ជាច្រើនមជ្ឈដ្ឋាន បាននិយាយថា គួរឲ្យសោកស្ដាយបំផុត ដែលឈ្មោះ «ភ្នំពេញ» ជារាជធានី ឬជាទីក្រុងធំរបស់កម្ពុជា បានជាប់ចំណាត់ថ្នាក់លេខ១ កាលពីពេលថ្មីៗសោះ មិនទាន់ទាំងបានប៉ុន្មានខ្យល់ផង បែរជាត្រូវគេយកឈ្មោះនេះ ទៅដាក់ឲ្យផលិតផលស្រាបៀរគឺ «ស្រាបៀរភ្នំពេញ» ជាជាតិស្រវឹងបំពុលដល់ សុខភាពប្រជាពលរដ្ឋ ដើម្បីតែបម្រើផលប្រយោជន៍ ក្រុមហ៊ុនឯកជនទៅវិញ ។ អាចបកប្រែមកថា ផឹកភ្នំពេញ គឺផឹកជាតិស្រវឹង បំផ្លាញសុខភាព និងដែលអាចបង្ក ជាគ្រោះថ្នាក់ចរាចរ រាល់យប់ថ្ងៃបើក្នុងករណីស្រវឹង ស្រាបៀរនេះហើយ នៅតែបើកបរដោយ មិនប្រុងប្រយ័ត្នទេនោះ ។
ប្រជាពលរដ្ឋបាននិយាយទៀតថា ធម្មតាការយកឈ្មោះសំខាន់ៗ ពាក់ព័ន្ធនឹងកិត្តិយសជាតិ ទៅដាក់ឈ្មោះឲ្យកន្លែង ឬផលិតផលផ្សេងៗ ជាលក្ខណៈធ្វើអាជីវកម្ម ផ្ទាល់ខ្លួនបែបនេះ បើសិនជាកន្លែង ឬផលិតផលអាជីវកម្មនោះ មិនបង្កផលប៉ះពាល់ ដល់ផលប្រយោជន៍ ឬសុខភាពមនុស្សទូទៅទេ ក៍មិនមានអ្នកណាប្រឆាំងជំទាស់ ឬក៍រិះគន់នោះដែរ ដូចជាឧទាហរណ៍ ការដាក់ឈ្មោះសាលារៀនភ្នំពេញ, មន្ទីរពេទ្យភ្នំពេញ, សណ្ឋាគារភ្នំពេញ… ជាដើម ។ ផ្ទុយទៅវិញ បើការយកឈ្មោះ «ភ្នំពេញ» ទៅដាក់ឈ្មោះឲ្យអ្វីៗ ដែលមានផលប៉ះពាល់ ដល់ផលប្រយោជន៍ ឬសុខភាពមនុស្សទូទៅ តួយ៉ាងជាស្រាបៀរភ្នំពេញ… វាអាចនឹងបណ្ដាលឲ្យ ប៉ះពាល់ដល់កិត្តិយស «រាជធានីភ្នំពេញ» នៅក្នុងពេលបច្ចុប្បន្ន ឬទៅថ្ងៃអនាគត ជាក់ជាមិនខានឡើយ ប្រសិនបើ«ស្រាបៀរភ្នំពេញ» អាចនឹងធ្វើឲ្យប៉ះពាល់ ដល់ផលប្រយោជន៍ ឬសុខភាពប្រជាពលរដ្ឋទូទៅនោះ ។
បញ្ហានេះសូម្បីតែ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃ ព្រះរាជាណាចក្រកម្ពុជា ក៍បានទទួលស្គាល់ ពីផលប៉ះពាល់ធ្ងន់ធ្ងរ ដែលបណ្ដាលមកពី គ្រឿងស្រវឹងនានាដែរ ដោយសម្ដេចតែងបាន មានប្រសាសន៍ជារឿយៗ រួចមកហើយថា «… បើស្រវឹង កុំបើកបរ… បើបើកបរ កុំពិសាគ្រឿងស្រវឹង» ។ នេះមិននិយាយពីគ្រឿងស្រវឹងខ្លះ ដែលគេផលិតខុសច្បាប់ ឬខុសស្តង់ដារអន្តរជាតិ ឬដាក់លក់ហួសកំណត់ នៃការប្រើប្រាស់ ធ្វើឲ្យអ្នកផឹកទាំងឡាយ មានគ្រោះថ្នាក់ធ្ងន់ធ្ងរ ចំពោះសុខភាពនោះផង ។
ពាក់ព័ន្ធនឹងបញ្ហានេះដែរ «ស្រាបៀរភ្នំពេញ» ត្រូវប្រជាពលរដ្ឋនាំគ្នារិះគន់ថា ក្រុមហ៊ុនស្រាបៀរមួយនេះ បានផ្សព្វផ្សាយពាណិជ្ជកម្ម ផលិតផលស្រាបៀររបស់ខ្លួន នៅតាមកញ្ចក់ទូរទស្សន៏ជាច្រើន នៅមុនថ្ងៃបោះឆ្នោត ជ្រើសតាំងតំណាងរាស្ត្រ នីតិកាលទី៥ កន្លងមក ។ ទង្វើនេះជាការផ្គើនទៅនឹង អនុសាសន៏ដ៍ថ្លៃថ្លារបស់ សម្ដេចអគ្គមហា សេនាបតីតេជោ ហ៊ុន សែន នាយករដ្ឋមន្ត្រីនៃ ព្រះរាជាណាចក្រកម្ពុជា និងការប្រកាសណែនាំ របស់ក្រសួងមហាផ្ទៃ ក៍ដូចជា គ.ជ.ប ដែលបានហាមប្រាមមិនឲ្យ វិទ្យុ និងទូរទស្សន៏ ព្រមទាំងបណ្តាញសារព័ត៌មាន ផ្សព្វផ្សាយពាណិជ្ជកម្មស្រាបៀរ ឬលក់ដូរគ្រឿងស្រវឹង ក្នុងថ្ងៃទី២៧ និងថ្ងៃទី២៨ ខែកក្កដា ឆ្នាំ២០១៣នោះទេ គឺដើម្បីចៀសវាងកុំឲ្យកើតមាន អំពើហឹង្សានៅក្នុងថ្ងៃនោះ ៕
