ប្រភពបានឲ្យដឹងថាអ្នកបើកសង្វៀន បញ្ជល់មាន់បង្កប់ល្បែងស៊ីសងច្រើនប្រភេទ នៅក្នុងតំបន់សេដ្ឋកិច្ចពិសេសឈនថារី មានខ្នងបង្អែកយ៉ាង រឹងមាំទើបហ៊ានធ្វើអ្វីៗ ស្រេចតែអំពើចិត្តរបស់ខ្លួន។ ប្រភពពីអ្នកធ្លាប់ចូលរួមលេងល្បែង បញ្ជល់មាន់និងល្បែងស៊ីសង ផ្សេងៗក្នុងទីតាំងនោះ បានឲ្យដឹងថា នៅផ្លូវចូលស ង្វៀនបញ្ជល់មាន់នោះមានកងសន្តិសុខយាមកាមយ៉ាងប្រយ័ត្នប្រយែងខ្លាចក្រែងអ្នកកាសែតចូលថតយករូបភាពទៅផ្សព្វផ្សាយ។ ប្រជាពលរដ្ឋក្នុងស្រុកមេមត់ ខេត្តត្បូងឃ្មុំ បានកត់សម្គាល់ថាចាប់តាំងពីមានសង្វៀនបញ្ជល់មាន់ត្រូវគេបើកលេងនៅក្បែរច្រកទ្វេភាគីដារ គឺអំពើចោរកម្មនិងបទល្មើសផ្សេងៗកើតឡើងគួរឲ្យភ័យខ្លាច។ ដូច្នេះហើយទើបប្រជាពលរដ្ឋអំពាវនាវឲ្យនាយឧត្តមសេនីយ៍ នេត សាវឿន អគ្គស្នងការនគរបាលជាតិ បង្ក្រាបសង្វៀនបញ្ជល់មាន់ក្នុងតំបន់សេដ្ឋកិច្ចពិសេសឈនថារី ជាបន្ទាន់ព្រោះលោក បែន រ័ត្ន ស្នងការនគរបាលខេត្តត្បូងឃ្មុំ និងលោក លី ឡេង អភិបាលខេត្តត្បូងឃ្មុំ នាំគ្នាដេកលក់យ៉ាងសុខស្រួលអស់ទៅហើយ។
ប្រភពពីប្រជាពលរដ្ឋរស់នៅក្នុងឃុំដារ ស្រុកមេមត់ ខេត្តត្បូងឃ្មុំ បានឲ្យដឹងថា នៅក្នុងតំបន់សេដ្ឋកិច្ចពិសេសឈនថារី កំពង់ចាម ច្រកទ្វេភាគីដារ ស្រុកមេមត់ កំពុងមានគេបើកល្បែងស៊ីសងយ៉ាងពេញបន្ទុកដោយគ្មានមន្ត្រីអាជ្ញាធរឬសមត្ថកិច្ចពាក់ព័ន្ធចាត់វិធានការបង្ក្រាបនោះឡើយ។ ប្រភពបានឲ្យដឹងទៀតថា នៅក្នុងបរិវេណទីតាំងតំបន់សេដ្ឋកិច្ចពិសេសនោះមានសង្វៀនបញ្ជល់មាន់ដ៏ធំមួយបង្កប់ដោយល្បែងស៊ីសងច្រើនប្រភេទទៀតកំពុងដំណើរការយ៉ាងរលូន ហើយអភិបាលស្រុកមេមត់ ក៏ដូចជាអធិការនគរបាលស្រុកមេមត់ ខេត្តត្បូងឃ្មុំ មិនចាត់វិធានការទប់ស្កាត់ទាល់តែសោះ។ សូម្បីតែលោកឧត្តមសេនីយ៍ទោ បែន រ័ត្ន ស្នងការនគរបាលខេត្តត្បូងឃ្មុំ និងលោក លី ឡេង អភិបាលខេត្តត្បូងឃ្មុំ ក៏មិនចាត់វិធានការបង្ក្រាបល្បែងស៊ីសងខុសច្បាប់ឲ្យស្របទៅតាមគោលនយោបាយភូមិឃុំមានសុវត្ថិភាពទាំង៩ចំណុចនោះទេ។
ប្រភពពីប្រជាពលរដ្ឋក្នុងឃុំដារ បានឲ្យដឹងទៀតថា សង្វៀនបញ្ជល់មាន់និងល្បែងស៊ីសងគ្រប់ប្រភេទក្នុងទីតាំងដីឡូត៍តំបន់សេដ្ឋកិច្ចពិសេសឈនថារី មានពលរដ្ឋខ្មែរចូលលេងយ៉ាងគគ្រឹកគគ្រេងដោយគ្មានសមត្ថកិច្ចឬមន្ត្រីអាជ្ញាធរមូលដ្ឋានណាទប់ស្កាត់តាមតួនាទីរបស់ខ្លួននៅឡើយ។ ប្រជាពលរដ្ឋបានបញ្ជាក់ថា បើគេធ្វើដំណើរតាមផ្លូវជាតិលេខ៧ ចេញពីខេត្តត្បូងឃ្មុំ រួចបត់ស្ដាំចូលតាមច្រកទ្វារទ្វេភាគីដារ ចម្ងាយប្រហែល៥០០ម៉ែត្រគឺប្រាកដជាឃើញទីតាំងបើកលេងល្បែងស៊ីសងយ៉ាងគគ្រឹកគគ្រេងនោះជាមិនខាន។ ប្រជាពលរដ្ឋបានឲ្យដឹងទៀតថា ជារៀងរាល់ថ្ងៃមានក្រុមអ្នកលេងល្បែងបញ្ជល់មាន់មកពីគ្រប់ទិសទីមកប្រមូលផ្ដុំគ្នានៅទីតាំងសង្វៀនបញ្ជល់មាន់ក្នុងតំបន់សេដ្ឋកិច្ចពិសេសឈនថារី ហើយក្នុងនោះមានសមត្ថកិច្ចប្រដាប់អាវុធនិងមន្ត្រីរាជការមួយចំនួនចូលរួមលេងល្បែងស៊ីសងយ៉ាងគគ្រឹកគគ្រេង។បឋម
