ប្រភពពីមន្ត្រីពេទ្យសត្វក្នុងខេត្តកំពង់ធំ មួយចំនួនបានឲ្យដឹងថា ការដែលលោក ចាន់ បញ្ញាវ័ន្ត មេពេទ្យសត្វខេត្តកំពង់ធំ ហ៊ានធ្វើអ្វីៗតាមអំពើចិត្តគឺដោយសារអាងមានខ្នងបង្អែករឹងមាំចាំជួយបិទបាំងនិងជួយការពារគ្រប់ពេលវេលា។ ដូច្នេះហើយទើបកន្លងមកលោក ចាន់ បញ្ញាវ័ន្ត តែងឃុបឃិតបើកដៃឲ្យក្រុមហ៊ុនស៊ីភី និងឈ្មួញមួយចំនួនទៀតដឹកជ្រូកគ្មានច្បាប់អនុញ្ញាតមកចែកចាយតាមទីសត្តឃាតក្នុងខេត្តកំពង់ធំ ហើយកាប់សាច់លក់ចែកចាយពេញទីផ្សារតែម្តង។ ឥឡូវនេះរឿងអាស្រូវពុករលួយតាមច្រើនរូបភាពរបស់លោក ចាន់ បញ្ញាវ័ន្ត ត្រូវបានបើកកកាយជាសាធារណៈ ហើយលោក ធីវ វណ្ណធី ប្រធានមន្ទីរកសិកម្មខេត្តកំពង់ធំ ក៏បានបញ្ជាឲ្យមន្ត្រីក្រោមឱវាទចាត់វិធានការបង្ក្រាបរថយន្តក្រុមហ៊ុនស៊ីភី ដឹកជញ្ជូនជ្រូក១៤០ក្បាលចូលមកស្រុកប្រាសាទសំបូរ ខេត្តកំពង់ធំ យកមកផាកពិន័យតាមច្បាប់ផងដែរ។ ជាងនេះទៅទៀតមន្ត្រីរាជការនិងប្រជាពលរដ្ឋក្នុងខេត្តកំពង់ធំ បានអំពាវនាវឲ្យថ្នាក់ដឹកនាំក្រសួងកសិកម្ម ពិនិត្យមើលបញ្ហាខាងលើនេះផងព្រោះលោក ចាន់ បញ្ញាវ័ន្ត មេពេទ្យសត្វខេត្តកំពង់ធំ ប្រើតួនាទីនិងអំណាចប្រព្រឹត្តអំពើពុករលួយយ៉ាងពេញបន្ទុកច្រើនឆ្នាំមកហើយ។
រឿងអាស្រូវពុករលួយរបស់លោក ចាន់ បញ្ញាវ័ន្ត មេពេទ្យសត្វខេត្តកំពង់ធំ ក្នុងការឃុបឃិតបើកដៃឲ្យឈ្មួញនិងក្រុមហ៊ុនមួយចំនួនដឹកជញ្ជូនសត្វជ្រូករស់មកលក់ចែកចាយក្នុងទឹកដីខេត្តកំពង់ធំ យ៉ាងពេញបន្ទុកត្រូវបានបើកកកាយជាបន្តបន្ទាប់ ក៏ប៉ុន្តែរហូតមកដល់ពេលនេះលោក ធីវ វណ្ណធី ប្រធានមន្ទីរកសិកម្មខេត្តកំពង់ធំ មិនទាន់ចាត់វិធានការតាមច្បាប់ទៅលើលោក ចាន់ បញ្ញាវ័ន្ត នៅឡើយទេ។ កាលពីថ្ងៃទី២២ ខែមិថុនា ឆ្នាំ២០១៨ ប្រធានការិយាល័យកសិកម្ម ស្រុកប្រាសាទសំបូរ បានចាត់វិធានការត្រួតពិនិត្យរថយន្តដឹកជ្រូកក្រុមហ៊ុនស៊ីភី(CP) ពាក់ស្លាកលេខ3A-2211 ពីខេត្តស្ទឹងត្រែង ចូលមកស្រុកប្រាសាទសំបូរ ដោយគ្មានលិខិត្តអនុញ្ញាត ហើយរាយការណ៍មកមន្ទីរកសិកម្មខេត្តកំពង់ធំ ដើម្បីផាកពិន័យជាទឹកប្រាក់២លានរៀល។ ប្រភពពីមន្ត្រីក្នុងមន្ទីរកសិកម្មខេត្តកំពង់ធំ បានឲ្យដឹងថា ការដែលក្រុមហ៊ុនស៊ីភី អាចដឹកជញ្ជូនជ្រូកពីខេត្តស្ទឹងត្រែង ចូលស្រុកប្រាសាទសំបូរ ដោយគ្មានលិខិតអនុញ្ញាតគឺដោយសារមានការឃុបឃិតបើកដៃពីសំណាក់លោក ចាន់ បញ្ញាវ័ន្ត មេពេទ្យសត្វខេត្តកំពង់ធំ តែម្តង។ប្រភពពីមន្ត្រីមន្ទីរកសិកម្មខេត្តកំពង់ធំ បានឲ្យដឹងទៀតថាលោក ចាន់ បញ្ញាវ័ន្ត ដែលជាមេពេទ្យសត្វខេត្តកំពង់ធំ តែងតែធ្វើរបាយការណ៍ភូតភរលោក ធីវ វណ្ណធី ប្រធានមន្ទីរកសិកម្មខេត្តកំពង់ធំ ហើយឃុបឃិតឲ្យឈ្មួញនាំចូលជ្រូករស់ពីស្រុកយួន និងស្រុកសៀម មកកាប់សាច់លក់ចែកចាយពេញទីផ្សារក្នុងខេត្តកំពង់ធំ។ ប៉ុន្តែទង្វើមិនប្រក្រតីរបស់លោក ចាន់ បញ្ញាវ័ន្ត ត្រូវបានបើកកកាយក្រោយពេលដែលលោក ចាន់ បញ្ញាវ័ន្ត ឃុបឃិតបើកដៃឲ្យក្រុមហ៊ុនស៊ីភី ដឹកជ្រូកពីខេត្តស្ទឹងត្រែង ចូលស្រុកប្រាសាទសំបូរ ខេត្តកំពង់ធំ ចំនួន១៤០ក្បាលដោយគ្មានលិខិតបញ្ជាក់សុខភាពសត្វនិងលិខិតអនុញ្ញាតក្នុងការដឹកជញ្ជូន។ ដូច្នេះល្មមដល់ពេលដែលលោក ធីវ វណ្ណធី ត្រូវចាត់វិធានការព្រមានទៅលើលោក ចាន់ បញ្ញាវ័ន្ត មេពេទ្យសត្វខេត្តកំពង់ធំ តាមអ្វីដែលកើតឡើងជាក់ស្ដែងជាបន្តបន្ទាប់កន្លងទៅនេះ។បឋម
