ប្រជាពលរដ្ឋរស់នៅក្នុងភូមិគោកកី និងភូមិមួយចំនួនទៀត ក្នុងឃុំតាផូ ស្រុកស្វាយចេក បានឲ្យដឹងទៀតថា ពួក គាត់ មិនចង់ឲ្យក្រុមហ៊ុនគង់មាន ធ្វើអាជីវកម្មថ្មភ្នំតាដុងក្នុង មូលដ្ឋានពួកគាត់ឡើយព្រោះជាការ បំផ្លាញសម្បត្តិធម្មជាតិ ដ៏មាន តម្លៃក្នុងមូលដ្ឋានពួកគាត់។ ប្រជាពលរដ្ឋក្នុងភូមិគោកកី បានឲ្យដឹងថា ប្រសិនបើក្រុមហ៊ុនគ ង់មាន ធ្វើអាជីវកម្មថ្មភ្នំនោះគឺធ្វើឲ្យប៉ះពាល់ដល់ផ្នូរសពដូនតារបស់អ្នកភូមិ ហើយភ្នំនោះគឺជាទីសក្ការៈបូជារបស់ពលរដ្ឋក្នុងមូលដ្ឋានតាំងពីដូនតាមក។ ដូច្នេះលោក សួន បវរ អភិបាលខេត្តបន្ទាយមានជ័យ ក៏ដូចជាប្រធានមន្ទីររ៉ែនិងថាមពលខេត្តបន្ទាយមានជ័យ មិនគួរគិតគូរតែរឿងផលប្រយោជន៍ផ្ទាល់ខ្លួនហើយបណ្ដោយឲ្យក្រុមហ៊ុនគង់មាន មកបំផ្លាញភ្នំតាដុង ជាទីគោរពបួងសួងរបស់ប្រជាពលរដ្ឋឡើយ។ ប្រជាពលរដ្ឋបានអំពាវនាវយ៉ាងទទូចឲ្យលោក ស៊ុយ សែម រដ្ឋមន្ត្រីក្រសួងរ៉ែនិងថាមពល ចាត់វិធានការទប់ស្កាត់កុំឲ្យក្រុមហ៊ុនគង់មាន ធ្វើអាជីវកម្មថ្មភ្នំតាដុង ហើយពួកគាត់នឹងប្រមូលផ្ដុំគ្នាតវ៉ាបន្តទៅទៀតបើទោះបីម្ចាស់ក្រុមហ៊ុនគង់មាន ត្រូវគេដឹងថាមានខ្នងបង្អែកជាមន្ត្រីជាន់ខ្ពស់ក្នុងខេត្ត។
ប្រជាពលរដ្ឋនៅក្នុងឃុំតាផូ ស្រុកស្វាយចេក បានប្រតិកម្មយ៉ាងខ្លាំងចំពោះអាជ្ញាធរខេត្តបន្ទាយមានជ័យ ក្នុងការឃុបឃិតឲ្យក្រុមហ៊ុនគង់មាន បោះទីតាំងធ្វើអាជីវកម្មកម្ទេចថ្មភ្នំនៅក្នុងមូលដ្ឋានពួកគាត់ ហើយទាំងមេភូមិគោកកីនិងប្រជាពលរដ្ឋបានដាក់លិខិតតវ៉ាឲ្យអាជ្ញាធរស្រុកស្វាយចេក និងអាជ្ញាធរខេត្តបន្ទាយមានជ័យ ចាត់វិធានការទប់ស្កាត់ជាបន្ទាន់។ បើតាមប្រភពខ្លះបង្ហើបឲ្យដឹងថា ប្រសិនបើគ្មានការឃុបឃិតបើកដៃពីសំណាក់លោក សួន បវរ អភិបាលខេត្តបន្ទាយមានជ័យ ក៏ដូចជាប្រធានមន្ទីររ៉ែនិងថាមពលខេត្តបន្ទាយមានជ័យ ទេនោះគឺក្រុមហ៊ុនគង់មាន មិនអាចបោះទីតាំងធ្វើអាជីវកម្មថ្មភ្នំនៅក្នុងភូមិគោកកី ឃុំតាផូ ស្រុកស្វាយចេក យ៉ាងគឃ្លើនបែបនេះឡើយ។ ដូច្នេះលោក ស៊ុយ សែម រដ្ឋមន្ត្រីក្រសួងរ៉ែនិងថាមពល គួរពិនិត្យឡើងវិញអំពីបញ្ហានេះព្រោះអភិបាលខេត្តបន្ទាយមានជ័យ ព្រមទាំងប្រធានមន្ទីររ៉ែនិងថាមពលខេត្តបន្ទាយមានជ័យ គិតតែផលប្រយោជន៍ផ្ទាល់ខ្លួនហើយមិនខ្វល់ពីផលប៉ះពាល់លើប្រជាពលរដ្ឋក្នុងមូលដ្ឋានឡើយ។
មន្ត្រីរាជការនិងប្រជាពលរដ្ឋក្នុងខេត្តបន្ទាយមានជ័យ បានកត់សម្គាល់ថា ច្រើនឆ្នាំកន្លងទៅនេះប្រធានមន្ទីររ៉ែនិងថាមពលខេត្តបន្ទាយមានជ័យ និងអភិបាលខេត្តបន្ទាយមានជ័យ គឺជាអ្នកឃុបឃិតឲ្យក្រុមនហ៊ុនជាច្រើនធ្វើអាជីវកម្មថ្មភ្នំ ក្នុងស្រុកមង្គលបុរី និងបណ្ដាស្រុកមួយចំនួនទៀតយ៉ាងគឃ្លើន។ ឥឡូវនេះអាជ្ញាធរខេត្តបន្ទាយមានជ័យ ឃុបឃិតជាមួយប្រធានមន្ទីររ៉ែនិងថាមពលខេត្តបន្ទាយមានជ័យ អនុញ្ញាតឲ្យក្រុមហ៊ុនគង់មាន បោះទីតាំងធ្វើអាជីវកម្មថ្មភ្នំ ក្នុងភូមិគោកកី ឃុំតាផូ ស្រុកស្វាយចេក យ៉ាងកំរោលតែម្តង។ ប្រជាពលរដ្ឋបានរិះគន់ថាចាប់តាំងពីលោក សួន បវរ ឡើងកាន់តំណែងជាអភិបាលខេត្តបន្ទាយមានជ័យ រួចមកគឺអាជីវកម្មថ្មភ្នំ មានសភាពកាន់តែខ្លាំងក្លាហើយភ្នំមួយចំនួនក្នុងទឹកដីខេត្តបន្ទាយមានជ័យ ត្រូវគេកាយដីលក់យកលុយចែកគ្នាធ្វើមានធ្វើបានយ៉ាងគឃ្លើនតែម្តង។បឋម
