តាមប្រភពមួយចំនួនបានឲ្យដឹងថា មួយរយៈចុងក្រោយនេះឈ្មួញឈ្មោះ លឹម កាំង គឺជាអ្នកធ្វើសកម្មភាព ដឹក ជញ្ជូ ន ឈើចេញពីខេត្តស្ទឹងត្រែង ចូលទៅខេត្តរតនគិរី និងខេត្តក្រចេះ តាមអំពើចិត្តព្រោះ មាន ការឃុប ឃិតបើក ដៃពីសំណាក់ មន្ត្រីរដ្ឋបាលព្រៃឈើ និងសមត្ថកិច្ចពាក់ព័ន្ធ ជាច្រើនស្ថាប័ន។ ប្រសិនបើគ្មានការឃុបឃិត បើកដៃពីសំ ណាក់លោក មាស សុផុន នាយខណ្ឌរដ្ឋបាលព្រៃឈើខេត្តស្ទឹងត្រែង ព្រមទាំងបក្ខពួកទេនោះគឺឈ្មួញឈ្មោះ លឹម កាំង ជាមន្ត្រីយោធា និងឈ្មួញយួនជាដៃគូ៤នាក់ទៀតមិនអាចដឹកជញ្ជូនឈើចេញពីទឹកដីខេត្តស្ទឹងត្រែង បានឡើយ។ ចំណែកលោក ម៉ុម សារឿន អភិបាលខេត្តស្ទឹងត្រែង និងលោក ម៉ៅ តារា ស្នងការនគរបាលខេត្តស្ទឹងត្រែង ក៏ទំនងមានជាប់ពាក់ព័ន្ធផលប្រយោជន៍ផងដែរទើបនាំគ្នារក្សាភាពស្ងៀមស្ងាត់ធ្វើមិនដឹងមិនឮអ្វីទាំងអស់ ក្នុងខណៈដែលព្រៃឈើក្នុងស្រុកសេសាន ស្រុកសៀមប៉ាង និងស្រុកថាឡាបរិវ៉ាត់ កំពុងតែប្រឈមនឹងសេចក្ដីវិនាស។
ប្រភពពីសកម្មជនព្រៃឈើនិងមន្ត្រីអង្គការក្រៅរដ្ឋាភិបាលក្នុងខេត្តស្ទឹងត្រែង បានឲ្យដឹងថា ឈ្មួញឈ្មោះ លឹម កាំង ជាមន្ត្រីយោធាផ្នែកស៊ើបអង្កេតប្រចាំទិសខេត្តស្ទឹងត្រែង និងឈ្មួញយួន៤នាក់ទៀតកំពុងប្រមូលទិញឈើនិងសម្រុកដឹកជញ្ជូនឈើចេញពីខេត្តស្ទឹងត្រែង យ៉ាងគគ្រឹកគគ្រេង។ ទន្ទឹមនឹងនេះឈ្មួញជាមន្ត្រីនគរបាលឈ្មោះ ម៉ៅ និងបក្ខពួកឈ្មោះ វីរៈ ក៏កំពុងសម្រុកទិញឈើនិងដឹកជញ្ជូនឈើពីខេត្តស្ទឹងត្រែង ចូលទៅខេត្តរតនគិរី ចូលទៅខេត្តក្រចេះ តាមក្បួនរថយន្តសាំយ៉ុងនិងរថយន្តច្រើនប្រភេទទៀតទាំងខ្សែៗដោយគ្មានមន្ត្រីរដ្ឋបាលព្រៃឈើឬសមត្ថកិច្ចពាក់ព័ន្ធណាចាត់វិធានការបង្ក្រាបឡើយ។ ប្រភពខ្លះបានឲ្យដឹងថា លោក មាស សុផុន នាយខណ្ឌរដ្ឋបាលព្រៃឈើខេត្តស្ទឹងត្រែង និងលោក លី ហ្គ្រន នាយផ្នែករដ្ឋបាលព្រៃឈើស្ទឹងត្រែង គឺជាអ្នកឃុបឃិតឲ្យឈ្មួញធ្វើអ្វីៗតាមអំពើចិត្តដើម្បីជាថ្នូរនឹងផលប្រយោជន៍។
តាមសេចក្ដីរាយការណ៍ពីមន្ត្រីអាជ្ញាធរនិងសមត្ថកិច្ចមូលដ្ឋានក្នុងក្រុងស្ទឹងត្រែង បានឲ្យដឹងថា កាលពីយប់ថ្ងៃទី០១ឈានចូលថ្ងៃទី០២ ខែកក្កដា ឆ្នាំ២០១៨ ឈ្មួញឈ្មោះ លឹម កាំង និងឈ្មួញមួយចំនួនទៀតបានដឹកឈើតាមរថយន្តសាំយ៉ុងនិងរថយន្តផ្សេងទៀតរាប់សិបគ្រឿងចេញពីខេត្តស្ទឹងត្រែង ចូលទៅខេត្តរតនគិរី យ៉ាងរលូន។ ក្រុមឈ្មួញទាំងនោះបានបង្ហើបឲ្យអ្នកសារព័ត៌មានដឹងថា ពួកគេបង់លុយប្រចាំជើងនិងប្រចាំខែឲ្យមន្ត្រីរដ្ឋបាលព្រៃឈើ ព្រមទាំងសមត្ថកិច្ចពាក់ព័ន្ធជាច្រើនស្ថាប័នតាមការកំណត់ទើបអាចដឹកជញ្ជូនឈើចេញពីខេត្តស្ទឹងត្រែង ចូលទៅខេត្តរតនគិរី និងខេត្តក្រចេះ ដោយគ្មានការរំខាន។ ក្នុងនោះសម្រាប់ឈ្មួញឈ្មោះ លឹម កាំង ត្រូវបានគេដឹងថាមានលោក មាស សុផុន នាយខណ្ឌរដ្ឋបាលព្រៃឈើខេត្តស្ទឹងត្រែង ជាខ្នងបង្អែកដ៏រឹងមាំទើបហ៊ានធ្វើសកម្មភាពដឹកជញ្ជូនឈើចេញពីខេត្តស្ទឹងត្រែង ដោយគ្មានញញើតអ្វីទាំងអស់។ សូម្បីតែមន្ត្រីគណៈកម្មការបង្ក្រាបនិងទប់ស្កាត់បទល្មើសព្រៃឈើដែលកំពុងបំពេញបេសកកម្មក្នុងខេត្តស្ទឹងត្រែង ក៏មិនហ៊ានប៉ះពាល់ឈ្មួញឈ្មោះ លឹម កាំង ដែលជាឈ្មួញបំផ្លាញព្រៃឈើយ៉ាងមហន្តរាយនោះទេ ដោយសារដឹងថាឈ្មួញម្នាក់នេះមានខ្នងបង្អែករឹងមាំចាំជួយការពារ។បឋម
