ពួកអ្នកតវ៉ាប្រឆាំងនៃក្រុម”គណៈកម្មាធិការកំណែទំរង់លទ្ធិប្រជាធិបតេយ្យរបស់ប្រជាជន(PDRC)”ដែលដឹកនាំដោយលោកស៊ូថេប ធឿកស៊ូបាន កាលពីព្រឹកថ្ងៃសៅរ៍ បានចាប់ផ្តើមការដើរដង្ហែក្បួនពីផ្លូវបំបែកមួយនៅក្រុងបាងកកដើអំពាវនាវអោយអ្នកក្រុងបាងកកចូលរួមយុទ្ធនាការបិទក្រុងបាងកក នៅមួយថ្ងៃបន្ទាប់ពីការផ្ទុះគ្រាប់បែកដែលបណ្តាលអោយអ្នកគាំទ្ររបស់លោកម្នាក់ស្លាប់និង៣៦នាក់របួស។
ពួកអ្នកប្រឆាំងតវ៉ា បានដើរដង្ហែរទៅកាន់ស្ពានអាកាសហួរ ចាង បន្ទាប់មកទៅកាន់ផ្លូវប្រសព្វរ៉ាតចាថេវី ផ្លូវផេតចាប៊ូរី និងផ្លូវ បានថាត ថង កន្លែងដែលអ្នកប្រឆាំងតវ៉ាបានរងការវាយប្រហារដោយគ្រាប់បែកកាលពីរសៀលថ្ងៃសុក្រ។
បាតុករសរុប៣៧នាក់បានរងរបួសដោយការផ្ទុះគ្រាប់បែកដៃ ដោយម្នាក់របួសធ្ងន់និងត្រូវបានប្រកាសថាស្លាប់កាលពីដើមថ្ងៃសៅរ៍។
លោកស៊ូថេប បាននិយាយថា លោកនិងអ្នកគាំទ្ររបស់លោកមិនខ្លាចសេចក្តីស្លាប់ទេ។លោកបានថ្កោលទោសការវាយប្រហារនេះ ដោយចាត់ទុកវាជាអំពើរបស់ចោរព្រៃ និងបានអំពាវនាវអោយរដ្ឋាភិបាលចាំផ្ទះទទួលខុសត្រូវចំពោះបរាជ័យនៅក្នុងការផ្តល់សន្តិសុខដល់បាតុករ៕
