ប្រជាពលរដ្ឋនៅខេត្តកោះកុងបានឲ្យដឹងថា ការពុះច្រៀកដីមណ្ឌលព័ត៌មានទេសចរណ៍នេះជួលឲ្យឯកជនធ្វើអាជីវកម្ម ជារឿងមិនត្រឹមត្រូវនោះទេ ព្រោះទីតាំងមួយនេះកន្លងមក គឺជាមណ្ឌលសម្រាប់ចែកចាយព័ត៌មានជូនដល់ភ្ញៀវទេសចរជាតិនិងអន្តរជាតិ មកពីទីជិតឆ្ងាយ ជាពិសេសវាជាដីសាធារណៈរបស់រដ្ឋមិនគួរពុះច្រៀកជួលទៅឲ្យឯកជន ធ្វើជាកន្លែងលក់ដូរឬធ្វើអាជីវកម្មដោយអនាធិបតេយ្យនោះទេ។ លោក ប៊ុន បៀវ បានពុះច្រៀកលក់ ជួលឲ្យឯកជន សូម្បីតែដីក្នុងបរិវេណមន្ទីរទេសចរណ៍ខេត្តកោះកុង ក៏លោក ប៊ុន បៀវ ពុះជាពីរដែរ ហើយដីដែលបែងចែកជាពីរចំណែកនោះមិនដឹងជាលោក ប៊ុន បៀវ យកទៅធ្វើជាកម្មសិទ្ធិខ្លួនឯងឬក៏យកទៅជូនអ្នកណាទេ ព្រោះគ្មាននរណាសួរនាំ ។ លោក ប៊ុន លើត ជាអភិបាលខេត្តកោះកុង បានផ្តល់គោលការណ៍ ឬយោបល់ឲ្យលោក ប៊ុន បៀវ ប្រធានមន្ទីរទេសចរណ៍ខេត្តកោះកុងអង្កន់ដីការិយាល័យព័ត៌មានទេសចរណ៍ ដែលស្ថិតនៅតាមបណ្តោយឆ្នេរព្រែកកោះប៉ោ ក្នុងសង្កាត់ស្មាច់មានជ័យ ក្រុងខេមរភូមិន្ទ ឬក៏យ៉ាងណានោះទេ។ ប៉ុន្តែពេលនេះលោក ប៊ុន បៀវ បានពុះច្រៀកដីទីតាំងមណ្ឌលព័ត៌មានទេសចរណ៍ជាកង់ៗលក់ឬជួលឲ្យឯកជនធ្វើអាជីវកម្ម បាត់បង់សោភ័ណភាព និងសណ្តាប់ធ្នាប់សាធារណៈស្ទើរតែមើលលែងយល់ទៅហើយ មិនដឹងជាប្រាក់ចំណូលពីការកាត់ដីកង់ៗលក់ឬជួលឲ្យឯកជននេះ បង់ចូលផ្នែកណាខ្លះទេ គ្រាន់តែដឹងថា វាជារឿងពុករលួយដែលលោក ប៊ុន បៀវ ជាអ្នកផ្តើមគំនិតក្នុងការប្រមូលផលប្រយោជន៍យកទៅច្រកហោប៉ៅផ្ទាល់ខ្លួន។
មន្ត្រីមួយចំនួនក៏បានបញ្ជាក់ផងដែរថា កាលពីជំនាន់លោក យុទ្ធ ភូថង ធ្វើជាអភិបាលខេត្តកោះកុង គឺលោក ប៊ុន បៀវ ធ្លាប់បានស្នើសុំដីរបស់ខេត្តចំនួន២កន្លែង គឺមួយកន្លែងសម្រាប់សាងសង់មន្ទីរទេសចរណ៍ និងមួយកន្លែងទៀតសម្រាប់សង់មណ្ឌលព័ត៌មានទេសចរណ៍ ហើយដោយយល់ថាការស្នើសុំរបស់លោក ប៊ុន បៀវ មានភាពសមរម្យបម្រើឲ្យផលប្រយោជន៍សាធារណៈ លោក យុទ្ធ ភូថង ក៏បានសម្រេចផ្តល់ដីធំៗចំនួន២កន្លែងទៅតាមសំណើរបស់លោក ប៊ុន បៀវ។ ប៉ុន្តែមកដល់ម៉ោងនេះ បែរជាលោក ប៊ុន បៀវ យកទីតាំងដីមណ្ឌលព័ត៌មានទេសចរណ៍ពុះច្រៀកជាកង់ៗលក់ឬជួលឲ្យឯកជនធ្វើអាជីវកម្មឬសង់ជាកន្លែងលក់ដូរតាមតែអំពើចិត្តហើយគេមិនច្បាស់ទេថាប្រាក់ចំណូលដែលបានមកពីការលក់ ឬជួលដីទាំងនេះត្រូវបង់ចូលផ្នែកណាខ្លះ ហើយលោក ប៊ុន លើត ជាអភិបាលខេត្តកោះកុង ក៏ទំនងជាទទួលបានផលប្រយោជន៍ខ្លះដែរហើយមើលទៅទើបស្ងៀមស្ងាត់។
ពាក់ព័ន្ធនឹងបញ្ហា នេះលោក ថោង ខុន ជារដ្ឋមន្ត្រីក្រសួងទេសចរណ៍ពិនិត្យស្រាវជ្រាវករណីនេះឡើងវិញជាបន្ទាន់ មិនគួរទុកឱកាសឲ្យលោក ប៊ុន បៀវ ធ្វើអ្វីៗតាមតែអំពើចិត្តទៀតែ។ គេមិនច្បាស់ទេថាតើប្រាក់ដែលបានមកពីសេវាផ្សេងៗតាមរបៀបពុករលួយនោះ លោក ប៊ុន បៀវ យកទៅបែងចែកថ្នាក់ណាខ្លះ គ្រាន់តែដឹងថាលោកប្រធានមន្ទីរទេសចរណ៍ខេត្តកោះកុងដ៏មានអំណាចម្នាក់នេះមានការផ្លាស់ប្តូរជីវភាពធួរធារជាងមុន ៕
