ប្រភពពីមន្ត្រីក្នុងមន្ទីរការងារ និងបណ្ដុះបណ្ដាលវិជ្ជាជីវៈ ខេត្តសៀមរាប បានឲ្យដឹងទៀត ថាច្រើនឆ្នាំកន្លង ទៅនេះលោក ច័ន្ទ សុខុមចិត្តា និងបក្ខពួកឃុបឃិតគ្នាកេងប្រវ័ញ្ចថវិការដ្ឋមិនតិចឡើយតាមរយៈការបំប៉ោងសំឡេងចំណាយគ្រប់ជំពូកនៅក្នុងមន្ទីរ។ ដូច្នេះលោក អ៊ិត សំហេង រដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈ មិនគួរទុកឲ្យលោក ច័ន្ទ សុខុមចិត្តា ឃុបឃិតគ្នាប្រព្រឹត្តអំពើពុករលួយយ៉ាងគឃ្លើនតទៅទៀតទេ ព្រោះអំពើពុករលួយរបស់ពួកគេមានសភាពកាន់តែខ្លាំងក្លាឡើង។ ទន្ទឹមនឹងនេះលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ក៏គួរបើកការស៊ើបអង្កេតទៅលើរឿងអាស្រូវពុករលួយរបស់លោក ច័ន្ទ សុខុមចិត្តា ព្រមទាំងបក្ខពួកឲ្យបានស៊ីជម្រៅផងដែរ ព្រោះច្រើនឆ្នាំកន្លងទៅនេះពួកគេឃុបឃិតគ្នាប្រព្រឹត្តអំពើពុករលួយកេងប្រវ័ញ្ចថវិការដ្ឋតាមរបៀបជិះសេះលែងដៃតែម្តង។ ប្រសិនបើនៅតែបណ្ដែតបណ្ដោយតទៅទៀតនោះ គឺលោក ច័ន្ទ សុខុមចិត្តា ព្រមទាំងបក្ខពួកមានអំណាចកាន់តែធំធេងក្នុងការប្រព្រឹត្តអំពើពុករលួយគ្មានទីបញ្ចប់ ហើយមន្ត្រីដែលដឹងរឿងពុករលួយរបស់លោក ច័ន្ទ សុខុមចិត្តា និងបក្ខពួកត្រូវប្រឈមនឹងការបណ្ដេញចេញពីការងារជាបន្តបន្ទាប់ដូចអ្វីដែលកើតឡើងនាពេលកន្លងមកជាមិនខាន។
ប្រភពពីមន្ត្រីនៅក្នុងមន្ទីរការងារខេត្តសៀមរាប បានឲ្យដឹងថា រយៈពេលប្រមាណ២សប្ដាហ៍ចុងក្រោយនេះលោក ច័ន្ទ សុខុមចិត្តា ប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្តសៀមរាប កាន់តែបានបង្ហាញភាពក្រអឺតក្រទមក្នុងការប្រព្រឹត្តអំពើពុករលួយស្រេចតែអំពើចិត្តរបស់ខ្លួន។ ប្រភពបានឲ្យដឹងទៀតថាលោក ច័ន្ទ សុខុមចិត្តា កំពុងលើកហេតុផលផ្សេងៗមកបិទបាំងទង្វើរបស់ខ្លួនក្នុងការដកហូតតំណែងមន្ត្រី២រូបនាពេលកន្លងមក ហើយកំពុងយកឈ្មោះមន្ត្រីធំៗនៅក្នុងក្រសួងការងារដើម្បីបិទបាំងអំពើអាក្រក់របស់ខ្លួនយ៉ាងក្រអឺតក្រទម។ ក្នុងនោះលោក ច័ន្ទ សុខុមចិត្តា បានយកឈ្មោះលោក អ៊ិត សំហេង រដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈ មកប្រើប្រាស់ដើម្បីបិទបាំងអំពើអាក្រក់របស់ខ្លួនយ៉ាងងងើលផងដែរ ដើម្បីគាបសង្កត់កុំឲ្យមន្ត្រីក្រោមឱវាទលាតត្រដាងរឿងអាស្រូវរបស់ខ្លួនបន្តទៀត។
ថ្មីៗនេះមន្ត្រីរាជការនៅក្នុងមន្ទីរការងារនិងបណ្ដុះបណ្ដាលវិជ្ជាជីវៈខេត្តសៀមរាប បានអំពាវនាវឲ្យលោក អ៊ិត សំហេង រដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈ ចាត់វិធានការទប់ស្កាត់អំពើពុករលួយបក្ខពួកនិយមរបស់លោក ច័ន្ទ សុខុមចិត្តា ដែលជាប្រធានមន្ទីរការងារខេត្តសៀមរាប ជាបន្ទាន់។ ដោយហេតុថាក្នុងតួនាទីជាប្រធានមន្ទីរការងារនិងបណ្ដុះបណ្ដាលវិជ្ជាជីវៈខេត្តសៀមរាប ច្រើនឆ្នាំមកនេះគឺលោក ច័ន្ទ សុខុមចិត្តា ប្រើតួនាទីនិងអំណាចប្រព្រឹត្តអំពើពុករលួយបក្ខពួកនិយមដោយគ្មានញញើតអ្វីទាំងអស់។ លើសនេះទៅទៀតបើមន្ត្រីណាហ៊ានបើកកកាយរឿងអាស្រូវពុករលួយពេញបន្ទុករបស់លោក ច័ន្ទ សុខុមចិត្តា និងបក្ខពួកនោះគឺលោកប្រធានប្រាកដជាចាត់វិធានការដកមន្ត្រីទាំងនោះបញ្ឈរជើងដើម្បីបិទបាំងរឿងអាស្រូវរបស់ខ្លួនយ៉ាងក្រអឺតក្រទមបំផុត។
ប្រភពដែលស្និទ្ធនឹងលោក ច័ន្ទ សុខុមចិត្តា ប្រធានមន្ទីរការងារខេត្តសៀមរាប បានឲ្យដឹងថា កន្លងមកលោក ច័ន្ទ សុខុមចិត្តា បានលួចរៀបចំកិច្ចប្រជុំហើយបានធ្វើកំណត់ហេតុទម្លាក់ទោសកំហុសទៅលើមន្ត្រី២រូប ហើយបណ្ដេញមន្ត្រីទាំង២រូបនេះចេញពីការងារយ៉ាងកំរោលដោយសារអាងខ្លួនមានបង្អែករឹងមាំនៅក្រសួងការងារនិងបណ្ដុះបណ្ដាលវិជ្ជាជីវៈ។ ប្រភពបានឲ្យដឹងទៀតថា មន្ត្រីទាំង២នាក់ដែលលោក ច័ន្ទ សុខុមចិត្តា បណ្ដេញចេញពីការងារនោះគឺឈ្មោះ អ៊ិន ភារធារី ជាប្រធានការិយាល័យរដ្ឋបាល និងឈ្មោះ ភាន់ មុនី ដែលជាអនុប្រធានការិយាល័យហិរញ្ញវត្ថុ។ ការដែលលោក ច័ន្ទ សុខុមចិត្តា ប្រើល្បិចបណ្ដេញមន្ត្រីទាំង២រូបនេះចេញពីការងារ គឺដោយសារពួកគាត់បានដឹងរឿងអាស្រូវពុករលួយរបស់លោក ច័ន្ទ សុខុមចិត្តា ព្រមទាំងបក្ខពួកយ៉ាងច្បាស់ ហើយអាចបើកកកាយនាពេលខាងមុខ។បឋម
