ប្រជាពលរដ្ឋជាអ្នករកស៊ីដឹកជញ្ជូនទំនិញមួយចំនួនបានឲ្យដឹងថាលោក ឆាយ សុខា ហៅកុក ដែលមានអំណាច បានពង្រាយមន្ត្រីក្រោមឱវាទឲ្យដាក់ប៉ុស្តិ៍ជជុះ ចំនួន៥កន្លែង រួមមានទី១ គល់ស្ពានជ្រាវ ២.ត្រពាំងថ្ម ៣.ឃុំដារ ក្នុងស្រុកមេមត់ ៤.ជិតផ្សារសួង និង៥ នៅលើផ្លូវជាតិលេខ ៦ ក្បែរប្រជុំជនស្គន់។ ប៉ុស្តិ៍ជជុះរបស់នគរបាលសេដ្ឋកិច្ចខេត្តកំពង់ចាម ក្រោមបញ្ជារបស់លោក ឆាយ សុខា ហៅកុក ភាគច្រើនមន្ត្រីស្លៀកពាក់ជាជនស៊ីវិល ហើយពេលខ្លះទៀតបានប្រើអ្នកភូមិឲ្យចុះប្រមូលលុយពីឡានដឹកទំនិញឡានដឹកឈើ និងឡានដឹកកសិផល ដើម្បីបន្លំភ្នែកសាធារណជន ប៉ុន្តែរឿងពិត កម្លាំងនគរបាលសេដ្ឋកិច្ចរបស់លោក ឆាយ សុខា ហៅកុក ចេញទៅប្រមូលលុយថ្លៃក្បាលឡានដឹកទំនិញគ្រប់ប្រភេទយកទៅចែកគ្នាធ្វើមានធ្វើបានមួយថ្ងៃៗមិនដឹងជាយកទៅណាអស់ទេ ហើយក៏មិនដែលមាននរណាហ៊ានសួរនាំពីបញ្ហានេះក៏ព្រោះតែលោក ឆាយ សុខា ហៅកុក មានឥទ្ធិពលធំធេងណាស់។
ក្រុមអ្នករកស៊ីដឹកជញ្ជូនទំនិញបានឲ្យដឹងថា ក្រុមនគរបាលសេដ្ឋកិច្ចខេត្តកំពង់ចាម មិនដែលបង្ហាញស្នាដៃអ្វីទេ ក្រៅពីការដាក់ប៉ុស្តិ៍ជជុះនិងរថយន្តសម្រាប់ប្រដេញឡានដឹកទំនិញឲ្យចូលបង់លុយទៅតាមតែអំពើចិត្ត ហើយប៉ុស្តិ៍ជជុះរបស់នគរបាលសេដ្ឋកិច្ចខេត្តកំពង់ចាម ដែលមានភាពអនាធិបតេយ្យខ្លាំងជាងគេ គឺនៅចំណុចជិតផ្សារសួង និងនៅចំណុចក្បែរប្រជុំជនស្គន់ ទីដែលមានការដឹកជញ្ជូនទំនិញនិងឈើខុសច្បាប់ឆ្លងកាត់យ៉ាងគគ្រឹកគគ្រេងក្នុងមួយថ្ងៃៗ។ នគរបាលសេដ្ឋកិច្ចរបស់លោក ឆាយ សុខា ហៅកុកក្តោបក្តាប់មុខសញ្ញាក្រុមឈ្មួញបានយ៉ាងច្បាស់ដូចថ្ងៃរះ ពោលគឺមន្ត្រីដែលឈរជើងដាក់ប៉ុស្តិ៍ជជុះគ្រាន់តែបង្ខំឲ្យអ្នករកស៊ីដឹកជញ្ជូនទំនិញបង់លុយថ្លៃបាយ ថ្លៃក្បាលឡានប៉ុណ្ណោះ ប៉ុន្តែសម្រាប់លុយដុំវិញត្រូវយកទៅបង់ជូនលោក ឆាយ សុខា ហៅកុក ជាប្រចាំខែ ទើបគ្មាននរណាកោសរូសប៉ះពាល់ដល់ការរកស៊ីដឹកជញ្ជូនទំនិញរបស់ពួកគេ ដូច្នេះហើយទើបបានជាក្រុមឈ្មួញជាច្រើន រៀបចំបញ្ជីខ្មៅមួយដើម្បីបើកប្រាក់ខែដល់មន្ត្រីនិងសមត្ថកិច្ចពាក់ព័ន្ធដែលនាំគ្នាដាក់ប៉ុស្តិ៍ជជុះតាមដងផ្លូវយ៉ាងអនាធិបតេយ្យ។
ប្រជាពលរដ្ឋក៏បានលើកឡើងផងដែរថា ពេលខ្លះគ្រាន់តែដឹកអាចម៍មាន់យកទៅធ្វើជី ដាក់ដំណាំក៏ក្រុមរបស់លោក ឆាយ សុខា ហៅកុក ចេញរថយន្តតាមប្រដេញឲ្យចូលបង់លុយចំនួន២ម៉ឺនរៀល ឬ៤ម៉ឺនរៀលផងដែរ បើទោះបីជាដឹងថា ប្រជាពលរដ្ឋដឹកត្រឹមអាចម៍មាន់ មិនមែនជាទំនិញដែលត្រូវបង់ពន្ធ ឬជាទំនិញខុសច្បាប់អ្វីក៏ដោយ។ នគរបាលសេដ្ឋកិច្ចរបស់លោក ឆាយ សុខា ហៅកុក ដែលឈរជើងតាមប៉ុស្តិ៍ជជុះសុទ្ធតែមានជំនាញប្រដេញតាមឡានដឹកឈើ និងឡានដឹកទំនិញឲ្យចូលបង់លុយធ្វើឲ្យគ្រប់ៗគ្នាញាក់សាច់ ហើយពេលខ្លះនគរបាលទាំងនោះដើរតួជាសមត្ថកិច្ចផង ដើរតួជាតុលាការផង គឺប្រដេញចាប់ឡានដឹកទំនិញឬឡានដឹកឈើឲ្យចូលបង់លុយស្ងាត់ៗហើយក៏ដោះលែងទៅវិញ ដោយមិនបានសុំយោបល់ពីព្រះរាជអាជ្ញា ឬរាយការណ៍ជូនថ្នាក់លើនោះទេ។ មន្ត្រីមួយចំនួនក៏បានលើកឡើងផងដែរថា ដើម្បីលុបបំបាត់ភាពអសកម្ម និងស្តារកិត្តិយសនគរបាលខេត្តកំពង់ចាមឡើងវិញ រឿងដែលត្រូវធ្វើមុនគេ គឺការផ្លាស់ប្តូរតំណែងលោក ឆាយ សុខា ហៅកុក ទើបសង្ឃឹមថាការកែទម្រង់អាចទទួលបានជោគជ័យ៕
