ប្រភពពីមន្ត្រីនិងភ្នាក់ងារគយ ក្នុងខេត្តកំពត មួយចំនួនបានបង្ហើបឲ្យដឹងថា មួយរយៈពេលចុងក្រោយ នេះលោក ហេ ង សំបូរ មេគយខេត្តកំពត និងលោក ញ៉ែម សេង ប្រធានការិយាល័យគ យច្រកទ្វារព្រែកចាក ឃុបឃិតគ្នាប្រព្រឹត្ត អំពើពុករលួយខ្លាំងក្លាជាងមុន ទៅទៀត។ ប្រភពបានឲ្យដឹងថា លោក ញ៉ែម សេង ប្រធាន ការិយាល័យគយច្រកព្រែកចាក បើកដៃឲ្យឈ្មួញធំៗនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់កាន់តែច្រើនឡើងៗដើម្បីជាថ្នូរនឹងផលប្រយោជន៍ផ្ទាល់ខ្លួន។ ការដែលលោក ញ៉ែម សេង ហ៊ានធ្វើអ្វីៗតាមអំពើចិត្ត គឺដោយសារអាងមានលោក ហេង សំបូរ មេគយខេត្តកំពត ជាខ្នងបង្អែករឹងមាំចាំជួយសម្របសម្រួល ហើយលោក ហេង សំបូរ មានខ្នងបង្អែករឹងមាំនៅក្នុងអគ្គនាយកដ្ឋានគយនិងរដ្ឋាករកម្ពុជា។
គួររំលឹកដែរថារឿងអាស្រូវពុករលួយច្រើនបែបច្រើនយ៉ាងរបស់លោក ញ៉ែម សេង ប្រធានការិយាល័យគយច្រកព្រែកចាក ស្រុកកំពង់ត្រាច ខេត្តកំពត ក៏ដូចជាអំពើពុករលួយរបស់លោក ហេង សំបូរ មេគយខេត្តកំពត ត្រូវបានលាតត្រដាងជាបន្តបន្ទាប់។ ក៏ប៉ុន្តែរហូតមកដល់ពេលនេះលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ក៏ដូចជាមេគយធំៗនៅក្នុងអគ្គនាយកដ្ឋានគយនិងរដ្ឋាករកម្ពុជា បែរជាធ្វើមិនដឹងមិនឮអ្វីទាំងអស់។ ហេតុនេះហើយទើបមន្ត្រីនិងភ្នាក់ងារគយខេត្តកំពត មួយចំនួនអំពាវនាវឲ្យលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ បើកការស៊ើបអង្កេតឲ្យបានស៊ីជម្រៅទៅលើរឿងអាស្រូវពុករលួយរបស់លោក ហេង សំបូរ និងលោក ញ៉ែម សេង ជាបន្ទាន់ហើយចាត់វិធានការទប់ស្កាត់ប្រកបដោយប្រសិទ្ធភាពផងដែរ។ បើមិនដូច្នេះទេលោក ហេង សំបូរ មេគយខេត្តកំពត និងលោក ញ៉ែម សេង ប្រធានការិយាល័យគយច្រកទ្វារអន្តរជាតិព្រែកចាក ឃុបឃិតគ្នាប្រព្រឹត្តអំពើពុករលួយកាន់តែខ្លាំងក្លាជាងមុនទៅទៀត។
បើតាមប្រភពពីមន្ត្រីពាក់ព័ន្ធនៅច្រកទ្វារអន្តរជាតិព្រែកចាក បានឲ្យដឹងថា បច្ចុប្បន្នទំនិញដែលឈ្មួញធំៗនាំចូលតាមច្រកទ្វារអន្តរជាតិព្រែកចាក គឺបង់ពន្ធត្រឹម២៥ទៅ៣០ភាគរយប៉ុណ្ណោះ ក្រៅពីនេះឈ្មួញឃុបឃិតបែងចែកផលប្រយោជន៍លើតុក្រោមតុជាមួយលោក ញ៉ែម សេង យ៉ាងសុខស្រួល។ ផ្ទុយទៅវិញលោក ញ៉ែម សេង ប្រើអំណាចគាបសង្កត់ទៅលើឈ្មួញតូចតាចនិងប្រជាពលរដ្ឋដែលនាំចូលទំនិញបន្តិចបន្តួចពីស្រុកយួនតាមច្រកព្រែកចាក ដោយគ្មានយោគយល់បន្តិចណាឡើយ។ មន្ត្រីគយនិងភ្នាក់ងារគយក្នុងខេត្តកំពត បានលើកឡើងថា លោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ មិនគួរបណ្ដែតបណ្ដោយឲ្យលោក ហេង សំបូរ និងលោក ញ៉ែម សេង ឃុបឃិតគ្នាប្រព្រឹត្តអំពើពុករលួយយ៉ាងពេញបន្ទុកដូចសព្វថ្ងៃនេះឡើយ ព្រោះធ្វើឲ្យរដ្ឋត្រូវខាតបង់ចំណូលពន្ធយ៉ាងច្រើនសន្ធឹកសន្ធាប់ក្នុងមួយខែៗ។ ម្យ៉ាងទៀតគឺដោយសារអាងមានខ្នងបង្អែករឹងមាំនៅក្នុងអគ្គនាយកដ្ឋានគយនិងរដ្ឋាករកម្ពុជា ទើបលោក ហេង សំបូរ និងបក្ខពួកឃុបឃិតគ្នាប្រព្រឹត្តអំពើពុករលួយតាមច្រើនរូបភាពប្រមូលលុយធ្វើមានធ្វើបានផ្ទាល់ខ្លួន។បឋម
