នៅពេលថ្មីៗនេះការប្រកាសចូលកាន់តំណែង ជាប្រធានសាខាគយខេត្តឧត្ដរមានជ័យ កាលពីរសៀលថ្ងៃទី ២២ ខែមករា ឆ្នាំ២០១៩ លោក ឈុន សុភមង្គល បានប្ដេជ្ញាអនុវត្តន៍តាមបាវចនា២ និងអភិក្រម៥ ដែលជា យុទ្ធសាស្ត្រឈ្នះៗរ បស់លោកនាយករដ្ឋមន្ត្រី ហ៊ុន សែន ដែលជាប្រមុខរាជរដ្ឋាភិបាល។ ដូច្នេះហើយទើបមន្ត្រីគយនិងភ្នាក់ងារគយមួយចំនួនក្នុងខេត្តឧត្ដរមានជ័យ រំពឹងទុកថាលោក ឈុន សុភមង្គល ប្រធានសាខាគយខេត្តឧត្ដរមានជ័យ មិនទុកឲ្យលោក គួន សុភាព ប្រធានការិយាល័យគយច្រកអូរស្មាច់ ឃុបឃិតឲ្យឈ្មួញនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់កាន់តែច្រើនឡើងៗនោះទេ។ ប្រភពពីមន្ត្រីគយក្នុងខេត្តឧត្ដរមានជ័យ បានលើកឡើងទៀតថា មិនមែនតែច្រកអូរស្មាច់ មួយប៉ុណ្ណោះទេដែលឈ្មួញនាំចូលទំនិញគេចពន្ធ ទំនិញបង់ពន្ធមិនគ្រប់និងទំនិញខុសច្បាប់យ៉ាងពេញបន្ទុក គឺនៅច្រកជាំ ស្រុកអន្លង់វែង និងច្រកជប់គគីរ ស្រុកបន្ទាយអំពឹល ក៏មេគយច្រកទាំង២នេះឃុបឃិតឲ្យឈ្មួញនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់កាន់តែច្រើនឡើង។
ប្រភពពីមន្ត្រីគយក្នុងខេត្តឧត្ដរមានជ័យ មួយចំនួនបានបង្ហើបឲ្យដឹងថា រហូតមកដល់ពេលនេះលោក គួន សុភាព ប្រធានការិយាល័យគយច្រកទ្វារអន្តរជាតិអូរស្មាច់ ក្រុងសំរោង ខេត្តឧត្ដរមានជ័យ នៅតែឃុបឃិតឲ្យឈ្មួញនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់តាមអំពើចិត្តដើម្បីជាថ្នូរនឹងផលប្រយោជន៍។ ដូច្នេះហើយទើបមានសេចក្ដីអំពាវនាវឲ្យលោក ឈុន សុភមង្គល ប្រធានសាខាគយខេត្តឧត្ដរមានជ័យ ដែលទើបចូលកាន់តំណែងជំនួសលោក យូ ហេង កាលពីរសៀលថ្ងៃទី២២ ខែមករា ឆ្នាំ២០១៩ ចាត់វិធានការទប់ស្កាត់អំពើពុករលួយរបស់លោក គួន សុភាព ខ្លះផង។ បើមិនដូច្នេះទេលោក គួន សុភាព ដែលអាងមានខ្នងបង្អែករឹងមាំ នៅតែបន្តប្រើតួនាទីនិងអំណាចរបស់ខ្លួនប្រព្រឹត្តអំពើពុករលួយតាមច្រើនរូបភាពដោយគ្មានញញើតអ្វីទាំងអស់។
កន្លងមករឿងអាស្រូវពុករលួយរបស់លោក គួន សុភាព ត្រូវបានលាតត្រដាងជាបន្តបន្ទាប់ហើយនៅពេលដែលលោក យូ ហេង កាន់តំណែងជាប្រធានសាខាគយខេត្តឧត្ដរមានជ័យ បានឃុបឃិតបើកដៃឲ្យលោក គួន សុភាព ធ្វើអ្វីៗស្រេចតែអំពើចិត្ត។ ឥឡូវនេះលោក យូ ហេង ត្រូវបានទៅធ្វើជាប្រធានសាខាគយខេត្តបាត់ដំបង ហើយលោក ឈុន សុភមង្គល មកកាន់តំណែងជាប្រធានសាខាគយខេត្តឧត្ដរមានជ័យ វិញដូច្នេះសង្ឃឹមថាលោក ឈុន សុភមង្គល មិនបណ្ដោយឲ្យលោក គួន សុភាព ប្រើអំណាចប្រព្រឹត្តអំពើពុករលួយយ៉ាងគឃ្លើនតទៅទៀតឡើយ។ ជាពិសេសលោក គុណ ញឹម ដែលជាមេគយធំៗមិនគួរទុកឲ្យលោក គួន សុភាព ប្រធានការិយាល័យគយច្រកទ្វារអន្តរជាតិអូរស្មាច់ ធ្វើអ្វីៗដូចពេលកន្លងមកនោះទេព្រោះទង្វើរបស់លោក គួន សុភាព ធ្វើឲ្យប៉ះពាល់ដល់វិធានការកែទម្រង់ស៊ីជម្រៅនៅក្នុងស្ថាប័នគយ។បឋម
