ប្រភពពីសមត្ថកិច្ច ក្នុងស្រុកក្រគរ បានឲ្យដឹងថាឈ្មួញឈ្មោះ កោះ សំភី ហៅ ហ៊ុំ ហយ ដែលមានទីលំនៅ ក្នុងឃុំឈើតុំ ស្រុកក្រគរ និងឈ្មួញឈ្មោះ វៃ រស់នៅឃុំស្នាអន្សា ស្រុកក្រគរ នៅតែប្រព្រឹត្តបទល្មើសព្រៃ ឈើដោយគ្មានញ ញើត អ្វីទាំងអស់។ មន្ត្រីអាជ្ញាធរមូលដ្ឋានក្នុងស្រុកវាលវែង និងស្រុកភ្នំក្រវាញ បានឲ្យដឹងថាឈ្មួញឈ្មោះ កោះ សំភី ហៅ ហ៊ុំ ហយ និងឈ្មោះ វៃ បានដាក់ម៉ាស៊ីនអារឈើខ្នាតធំនៅក្នុងព្រៃការពារ ព្រៃអភិរក្ស បំផ្លាញព្រៃឈើយ៉ាងមហន្តរាយហើយដឹកជញ្ជូនឈើតាមរថយន្តបង្កុងឬរថយន្តម៉ាករ៉េវចូលមកតំបន់បំណក់ ឃុំឈើទុំ ស្រុកក្រគរ ដោយគ្មានមន្ត្រីជំនាញឬសមត្ថកិច្ចពាក់ព័ន្ធណាហ៊ានប៉ះពាល់ពួកគេទេ។ ប្រភពពីសមត្ថកិច្ចពាក់ព័ន្ធបានឲ្យដឹងថាឈ្មួញឈ្មោះ កោះ សំភី ហៅ ហ៊ុំ ហយ មានរថយន្តកែច្នៃ៧ទៅ៨គ្រឿងសម្រាប់ដឹកជញ្ជូនឈើចេញពីព្រៃ ចំណែកឈ្មួញឈ្មោះ វៃ មានរថយន្តកែច្នៃចំនួន៤គ្រឿងសម្រាប់ដឹកជញ្ជូនឈើយ៉ាងរលូន។
ប្រភពពីប្រជាពលរដ្ឋនិងសមត្ថកិច្ចពាក់ព័ន្ធក្នុងស្រុកវាលវែង ខេត្តពោធិ៍សាត់ បានឲ្យដឹងថា បច្ចុប្បន្នឈ្មួញឈ្មោះ តាហយ នៅតែបន្តសកម្មភាពដឹកជញ្ជូនឈើចេញពីស្រុកវាលវែង យ៉ាងរាលដាលព្រោះមានការឃុបឃិតបើកដៃពីសំណាក់មន្ត្រីបរិស្ថាន និងមន្ត្រីរដ្ឋបាលព្រៃឈើផងដែរ។ ប្រភពបានឲ្យដឹងថា ឈ្មួញឈ្មោះ កោះ សំភី ហៅ ហ៊ុំ ហយ ឬតាហយ បានអួតអាងប្រាប់គេឯងពីរឿងខ្លួនបង់លុយឲ្យលោក ម៉ៅ ធនិន អភិបាលខេត្តពោធិ៍សាត់ ជាប្រចាំទើបអាចដឹកជញ្ជូនឈើចេញពីស្រុកវាលវែង និងស្រុកភ្នំក្រវាញ យ៉ាងរលូន។ ដូច្នេះថ្នាក់ដឹកនាំក្រសួងនិងស្ថាប័នពាក់ព័ន្ធគួរពិនិត្យឡើងវិញអំពីបញ្ហានេះ ព្រោះក្នុងខេត្តពោធិ៍សាត់ គ្មាននរណាហ៊ានប៉ះពាល់លោក ម៉ៅ ធនិន អភិបាលខេត្តពោធិ៍សាត់ ដែលមានខ្នងបង្អែករឹងមាំនោះឡើយទើបឈ្មួញតែងប្រើប្រាស់ឈ្មោះ លោក ម៉ៅ ធនិន ដើម្បីផលប្រយោជន៍ពួកគេ។
ប្រភពដែលស្និទ្ធនឹងឈ្មួញឈ្មោះ កោះ សំភី ហៅ ហ៊ុំ ហយ បានឲ្យដឹងថា ឈ្មួញម្នាក់នេះហ៊ានធ្វើអ្វីៗតាមអំពើចិត្តហើយអួតអាងប្រាប់អ្នកភូមិថា ខ្លួនបង់លុយដាក់ខែឲ្យលោក ម៉ៅ ធនិន អភិបាលខេត្តពោធិ៍សាត់ ជាប្រចាំដូច្នេះគ្មានមន្ត្រីជំនាញឬសមត្ថកិច្ចណាហ៊ានប៉ះពាល់ឡើយ។ ទន្ទឹមនឹងនេះឈ្មួញឈ្មោះ កោះ សំភី ហៅ ហ៊ុំ ហយ ក៏អួតអាងពីរឿងបង់លុយឲ្យមន្ត្រីបរិស្ថាន និងមន្ត្រីរដ្ឋបាលព្រៃឈើតាមការកំណត់ដើម្បីអាចបំផ្លាញព្រៃឈើនៅក្នុងតំបន់ដែនជម្រកសត្វព្រៃភ្នំឱរ៉ាល់ ក៏ដូចជាក្នុងតំបន់ដែនជម្រកសត្វព្រៃភ្នំសំកុស និងតំបន់អភិរក្សជួរភ្នំក្រវាញភាគកណ្ដាល តាមអំពើចិត្ត។ ដូច្នេះថ្នាក់ដឹកនាំក្រសួងពាក់ព័ន្ធ ជាពិសេសរដ្ឋមន្ត្រីក្រសួងកសិកម្ម និងរដ្ឋមន្ត្រីក្រសួងបរិស្ថាន មិនគួរមើលរំលងបញ្ហានេះទេ ព្រោះបច្ចុប្បន្នឈ្មួញឈ្មោះ កោះ សំភី ហៅ ហ៊ុំ ហយ កំពុងបំផ្លាញព្រៃឈើយ៉ាងមហន្តរាយដោយគ្មានញញើតអ្វីទាំងអស់ ហើយថែមទាំងប្រើប្រាស់ឈ្មោះ លោក ម៉ៅ ធនិន អភិបាលខេត្តពោធិ៍សាត់ ធ្វើជាបង្អែក។បឋម
