ខេត្តសៀមរាប ៖ កាលពីល្ងាចថ្ងៃទី៩ ខែកុម្ភៈ ឆ្នាំ២០១៤ មានរថយន្ត១គ្រឿងម៉ាកប៉ាសារ៉ូពាក់ផ្លាកលេខ១.ឆ.៨៨២៥.ភព២ បានដឹកឈើប្រណីតប្រភេទធ្នង់ជាច្រើនដុំបានទម្លាក់លក់ឲ្យលោកសុខ ថុល ដែលមានទីតាំងតាមបណ្ដោយផ្លូវជាតិលេខ៦ ស្ថិតក្នុងភូមិបន្ទាយចាស់ ក្រុងសៀមរាប ខេត្តសៀមរាប ។ លោក សុខ ថុល នាយករងរដ្ឋបាល និងជាជំនួយការចៅហ្វាយខេត្តសៀមរាប លោក ឃឹម ប៊ុនសុង ដែលគេដឹងយ៉ាងច្បាស់ថាជាមនុស្សជំនិតរបស់អភិបាលខេត្តផងនោះបច្ចុប្បន្ននេះបានទិញឈើប្រណីតៗដោយខុសច្បាប់គ្មាននណាហ៊ានប៉ះពាល់នោះឡើយ ហើយ កំពុងតែរុញច្រានប្រជាប្រិយភាពលោក ឃឹម ប៊ុនសុង ឲ្យកាន់តែធ្លាក់ថែមទៀត ។
ពាក់ព័ន្ធទៅនឹងការចោទប្រកាន់រិះគន់ពេញៗ មាត់ពីសំណាក់ប្រជាពលរដ្ឋទៅលើជំនួយការចៅហ្វាយខេត្តសៀមរាប ដែកគេនិយាយថាជាមន្ត្រីជំនិតរបស់អភិបាលខេត្តផងនោះលោក សុខ ថុល បានឆ្លើយបដិសេធចំពោះព័ត៌មាននេះថាមិនបានទិញឈើនោះទេហើយក៏មិនមែនផ្ទះលោកដែរ។
ជុំវិញបញ្ហាខាងលើនេះជំនួយការចៅហ្វាយខេត្តសៀមរាបកំពុងទទួលរងនូវការរិះគន់ដោយចំៗថា កំពុងតែទទួលទិញឈើប្រណីតដោយ ខុសច្បាប់យ៉ាងអនាធិបតេយ្យបំផុតនៅខណៈពេលដែលសកម្មភាពបទល្មើសព្រៃឈើនៅសៀមរាបបានកើតមានយ៉ាងផុសផុលនោះ។ បើទោះបីជា ជំនួយការជាន់ខ្ពស់រូបនេះមិនបានធ្វើការបកស្រាយឲ្យបានពិស្ដាយ៉ាងណាក្ដី ឬឆ្លើយយករួចខ្លួនក៏ដោយក៏ម្ចាស់ឈើបាននិយាយថា ឈើនេះប្រភេទធ្នង់ហើយអ្នកទិញជាលោក សុខ ថុល ។
គួបញ្ជាក់ថាបច្ចុប្បន្ននេះសកម្មភាពកាប់បំផ្លាញព្រៃឈើ និងដឹកជញ្ជូនឈើគ្រប់ប្រភេទកំពុងតែកើតមានយ៉ាងគគ្រឹកគគ្រេងបំផុតមិនត្រូវបាន អាជ្ញាធរ និងសមត្ថកិច្ចពាក់ធ្វើការបង្ក្រាបនោះទេ។ កត្តាទាំងនេះបានធ្វើឲ្យព្រៃឈើនៅក្នុងសៀមរាប ទទួលរងនូវកាប់បំផ្លាញយ៉ាងរង្គាលពីសំណាក់ឈ្មួញទុច្ចរិតមួយចំនួនដែលរកស៊ីបទល្មើសផ្គើនទៅនឹងអនុសាសន៍របស់ប្រមុខរាជរដ្ឋាភិបាល។
គេនៅនឹកចាំថា កាលពីសម័យលោក សូ ភិរិន្ទ ជាចៅហ្វាយខេត្តសៀមរាបក្នុងនោះមានលោក ម៉ឹង វុទ្ធី នាយរងខុទ្ធការរិយាល័យហើយជាជំនួយការផងនោះ បើទោះបីជាការដឹកនាំគ្រប់គ្រង់របស់លោក សូ ភិរិន្ទ នាពេលមានការរិះគន់ និងការកោតសសើលាយឡំគ្នារយ៉ាងណាក្ដី ។ ប៉ុន្តែការដឹកនាំរដ្ឋបាលខេត្តជាមួយអ្នកកាសែតនិងមន្ត្រីថ្នាក់ក្រោមនាពេលកន្លងទៅនោះឃើញថា លោក ម៉ឹង វុទ្ធី និងលោក សូ ភិរិន្ទ មិនមានប្រកាន់បក្ខពួកនិយមនោះឡើយ ពោលគឺពួកគាត់ទាំងពីនាក់តែងតែមានការទំនាក់ទំនងល្អជាមួយអ្នកកាសែតរួមជាមួយមន្ត្រីក្រោមឱវាទជានិច្ច។
ប៉ុន្តែស្របពេលលោក សូ ភិរិន្ទ កំពុងតែមានការទំនាក់ទំនងល្អជាមួយមន្ត្រីរដ្ឋបាលថ្នាក់ក្រោម និងក្រុមអ្នកកាសែតដែលជាប្រព័ន្ធផ្សព្វផ្សាយអំពីសកម្មភាពសង្គមពីមួយថ្ងៃទៅមួយថ្ងៃនោះនៅខណៈដែរលោក ម៉ឹង វុទ្ធី ក៏ត្រូវបានផ្ទេភារកិច្ចឲ្យទៅកាន់តំណែងជាចៅហ្វាយស្រុកបន្ទាយស្រី ហើយអ្នកដែលមកជំនួសតំណែងជំនួយការលោក សូ ភិរិន្ទ គឺលោក សុខ ថុល បច្ចុប្បន្ននេះ ។ ចាប់ពីពេលលោក សុខ ថុល បានមកជំនួសលោក សូ ភិរិន្ទ នោះមកឃើញថា អតីតការដឹកនាំចៅហ្វាយខេត្តបានធ្លាក់កូដនិងមានបក្សពួកនិយម ដោយសាតែជំនួយការលោក សុខ ថុល គិតតែពីអែមអប ធ្វើឲ្យមន្ត្រីនៅក្នុងសាលាខេត្តមានការអាក់អន់ចិត្តចំពោះអភិបាលខេត្តហើយអ្នកកាសែតក៏មិនខុសពីមន្ត្រីសាលាខេត្តដែរពោល គឺការទំនាក់ទំនងព័ត៌មានបានធ្លាក់ចុះយ៉ាងគំហុកមិនដឹងថា លោក សុខ ថុល គាត់មានគំនិតអ្វីជាមួយអ្នកកាសែតទេ ចាប់ពីពេលនោះមកអ្នកកាសែតមិនហ៊ានទៅក្បែរចៅហ្វាយខេត្តទេរហូតដល់សម័យលោក ឃឹម ប៊ុនសុង នេះ៕
