សេចក្តីរាយការណ៍ពីមន្ត្រីប្រចាំច្រកព្រំដែនមួយចំនួនបានឲ្យដឹងថា ជាធម្មតាឧកញ៉ា ស៊ិន ឃីម បាននាំចូលប្រេងសាំងមកពីស្រុកសៀម ទៅតាមសំណើពិសេសមួយដែលមានការឯកភាពពីអភិបាលខេត្តប៉ៃលិន ឲ្យយកមកប្រើប្រាស់នៅតាមតំបន់ព្រំដែន ប៉ុន្តែស្ថានភាពនៃការនាំចូលប្រេងសាំងជាក់ស្តែងឧកញ៉ា ស៊ិន ឃីម នាំចូលលើសចំនួនកំណត់ ម្តងៗរាប់រយតោនឯណោះ គេមិនដែលឃើញជំនាញគយរបស់លោក លឹម សម្បត្តិ ត្រួតពិនិត្យឬទប់ស្កាត់ពីបញ្ហានេះម្តងណាឡើយ មិនដឹងជាមានអាថ៌កំបាំងអ្វី។ ជាគោលការណ៍ឧកញ៉ា ស៊ិន ឃីម ទទួលបានការអនុញ្ញាតឲ្យនាំចូលប្រេងសាំងមកប្រើប្រាស់ឬចែកចាយតែក្នុងបរិវេណទឹកដីខេត្តប៉ៃលិន ប៉ុណ្ណោះ ក្នុងចំនួនកំណត់មួយ ប៉ុន្តែឧកញ៉ា ស៊ិន ឃីម ក៏បានឃុបឃិតផ្តល់ផលប្រយោជន៍ឲ្យជំនាញគយនិងសមត្ថកិច្ចពាក់ព័ន្ធទើបអាចនាំចូលប្រេងសាំងតាមខេត្តប៉ៃលិន លើសចំនួនដែលបានកំណត់ម្តងៗរាប់រយតោន ហើយបន្តយកទៅលក់ចែកចាយដល់បណ្តាស្រុកមួយចំនួនលើទឹកដីខេត្តបាត់ដំបង ដូចជាស្រុកកំរៀង និងស្រុកភ្នំព្រឹកជាដើម មិនដែលមាននរណាហ៊ានហើបមាត់ទេ។
ក្នុងមួយខែៗចំណូលថវិកាជាតិត្រូវបានបាត់បង់ច្រើនសន្ធឹកសន្ធាប់ដោយសារតែអំពើរត់ពន្ធប្រេងសាំងរបស់ឧកញ៉ាស៊ិន ឃីម តាមច្រកព្រំដែនខេត្តប៉ៃលិនយកទៅចែកចាយដល់បណ្តាស្រុកជាច្រើនក្នុងខេត្តបាត់ដំបង មិនដែលមានសមត្ថកិច្ចឬមន្ត្រីជំនាញចាត់វិធានការបង្ការបង្ក្រាបឲ្យមានប្រសិទ្ធភាពម្តងណាឡើយ ទុកឲ្យឧកញ៉ា ស៊ិន ឃីម ធ្វើអ្វីៗតាមតែអំពើចិត្ត។ គេមិនដឹងថាជំនាញគយប្រចាំច្រកព្រំ របស់លោក លឹម សម្បត្តិ និងប្រធានសាខាគយ ខេត្តប៉ៃលិន លោក អ៊ុក វណ្ណច័ន្ទ ទទួលបានផលប្រយោជន៍ពីជំនួញប្រេងសាំងគេចពន្ធរបស់ឧកញ៉ា ស៊ិន ឃីម ប៉ុន្មាននោះទេ ក្នុងមួយខែៗប៉ុន្តែគេដឹងថាមេគយចល័តម្នាក់ ដែលគ្រាន់តែបិទភ្នែកមើលមិនឃើញការរត់ពន្ធប្រេងសាំងរបស់ឧកញ៉ា ស៊ិន ឃីម ទទួលបានរបបប្រចាំខែមិនតិចជាង៤ម៉ឺនដុល្លារនោះទេ?។
ឧកញ៉ា ស៊ិន ឃីម ប្រកបអាជីពនាំចូលប្រេងសាំងគេចពន្ធ ហើយបើបង់ពន្ធវិញយ៉ាងច្រើនបំផុតត្រឹម៦០ភាគរយប៉ុណ្ណោះ ហើយជំនាញគយគ្រប់ជាន់ថ្នាក់សុទ្ធតែទទួលបានរបបប្រចាំខែពីឧកញ៉ា ស៊ិន ឃីម ជាទៀងទាត់ទើបអ្វីៗអាចដំណើរការដោយរលូនល្អ ហើយគេមិនដឹងថាឧកញ៉ា ស៊ិន ឃីម មានខ្នងបង្អែកធំប៉ុនណាទេ ទើបគាត់អាចបង្កព្យុះភ្លៀងតាមតែអំពើចិត្តក្នុងការនាំចូលប្រេងសាំងបង់ពន្ធមិនគ្រប់មកលក់ចែកចាយតាមតំបន់ព្រំដែនយ៉ាងអនាធិបតេយ្យ។ គេចង់ឃើញអគ្គនាយកដ្ឋានគយនិងរដ្ឋាករពិនិត្យមើលឡើងវិញអំពីបែបបទដែលឧកញ៉ា ស៊ិន ឃីម នាំចូលប្រេងសាំងមកពីស្រុកសៀម យកមកលក់ចែកចាយក្នុងខេត្តប៉ៃលិន និងបន្តដល់បណ្តាស្រុកមួយចំនួនក្នុងខេត្តបាត់ដំបង ព្រោះបានធ្វើឲ្យខាតបង់ចំណូលថវិកាជាតិយ៉ាងច្រើនសន្ធឹកសន្ធាប់ក្នុងមួយខែៗ ប៉ុន្តែប្រាក់ទាំងនេះបានហូរចូលហោប៉ៅមន្ត្រីគយពុករលួយមានលោក លឹម សម្បត្តិ និងលោក អ៊ុក វណ្ណច័ន្ទ ដែលគិតគូរតែប្រយោជន៍ផ្ទាល់ខ្លួនយ៉ាងងងើល។
ក្រៅពីជំនួញនាំចូលប្រេងសាំងបង់ពន្ធមិនគ្រប់ឧកញ៉ា ស៊ិន ឃីម បានធ្វើជាមេការគ្រប់គ្រងកាស៊ីណូ ដល់ទៅពីរបីកន្លែងតាមតំបន់ព្រំដែន ហើយពេលខ្លះទៀត ឧកញ៉ា ស៊ិន ឃីម បានយកឈ្មោះអ្នកតំណាងរាស្ត្រនិងជាភរិយាអភិបាលខេត្តប៉ៃលិន ទៅប្រើប្រាស់ក្នុងការបំភិតបំភ័យគំរាមកំហែងមន្ត្រីនិងសមត្ថកិច្ចមួយចំនួនមិនឲ្យកោសរូស ឬរំខានជំនួញរកស៊ីមិនស្របច្បាប់របស់ខ្លួនផងដែរ។ គេមិនច្បាស់ទេថា តើឧកញ៉ា ស៊ិន ឃីម មានទំនាក់ទំនងអ្វីពិសេសជាមួយលោក ស្រី បាន ស្រីមុំ ដែលជាស្ត្រីដ៏ល្បីល្បាញធ្លាប់ប្រឡូកក្នុងការរកស៊ីដឹកជញ្ជូនទំនិញបង់ពន្ធមិនគ្រប់តាមខេត្តប៉ៃលិននោះទេ ប៉ុន្តែជាញឹកញាប់គេមិនដែលឃើញលោកស្រី បាន ស្រីមុំ មានប្រតិកម្មចំពោះរឿងដែលឧកញ៉ា ស៊ិន ឃីម យកឈ្មោះរបស់គាត់ទៅប្រើប្រាស់នោះទេ ធ្វើឲ្យគ្រប់ៗគ្នាសង្ស័យថា ជំនួញរកស៊ីនាំចូលប្រេងសាំងបង់ពន្ធមិនគ្រប់របស់ឧកញ៉ា ស៊ិន ឃីម ទំនងជាមានភាគហ៊ុនរបស់ភរិយា អភិបាលខេត្តប៉ៃលិនហើយមើលទៅ។ លោក លឹម សម្បត្តិ និងលោក អ៊ុក វណ្ណច័ន្ទ គិតគូរពីការបង្កើនចំណូលពន្ធឲ្យស្របទៅតាមគោលការណ៍កែទម្រង់ស៊ីជម្រៅនោះទេ ព្រោះថា ការរកស៊ីនាំចូលប្រេងសាំងបង់ពន្ធមិនគ្រប់របស់ឧកញ៉ា សុិន ឃីម បានផ្តល់ផលប្រយោជន៍ក្រោមតុ ដែលលោក លឹម សម្បត្តិ និងលោក អ៊ុក វណ្ណច័ន្ទ ប្រមូលយកទៅច្រកហោប៉ៅធ្វើមានធ្វើបានផ្ទាល់ខ្លួន ៕
