ប្រភពពីប្រជាពលរដ្ឋនៅភូមិដាក់ដាំ ឃុំដាក់ដាំ ខេត្តមណ្ឌលគិរី បានឲ្យដឹងថា នៅក្នុងមូលដ្ឋានពួកគាត់មានល្បែងស៊ីសងជ្រកក្រោមកាស៊ីណូ ដំណើរការយ៉ាងរលូនហើយអ្នកចូលលេងល្បែងភាគច្រើនលើសលប់ជាជនជាតិខ្មែរ ចំណែកជនជាតិយួនមានតិចតួចបំផុត។ ប្រជាពលរដ្ឋបានរាយការណ៍ថា នៅក្នុងកាស៊ីណូនោះមានបើកល្បែងបញ្ជល់មាន់និងអាប៉ោងទ្រង់ទ្រាយធំហើយជនជាតិខ្មែរដែលចូលលេងល្បែងស៊ីសងក្នុងកាស៊ីណូនោះចាញ់អស់លុយកាក់ទ្រព្យសម្បត្តិ រថយន្តឬម៉ូតូជាបន្តបន្ទាប់។ ចំណែកលោកឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរី ក៏ដូចជាលោក ស្វាយ សំអ៊ាង អភិបាលខេត្តមណ្ឌលគិរី មិនចាត់វិធានការទៅលើម្ចាស់កាស៊ីណូដែលបើកឲ្យជនជាតិខ្មែរចូលលេងល្បែងស៊ីសង ខុសពីការកំណត់នៅក្នុងច្បាប់នោះទេ។
តាមការកត់សម្គាល់របស់ប្រជាពលរដ្ឋក្នុងភូមិដាក់ដាំ ឃុំដាក់ដាំ ស្រុកអូររាំង បានឲ្យដឹងថា ចាប់តាំងពីកាស៊ីណូនោះបើកល្បែងបញ្ជល់មាន់និងល្បែងអាប៉ោងទ្រង់ទ្រាយធំ គឺមានពលរដ្ឋក្នុងមូលដ្ឋានក៏ដូចជាអ្នកមកពីបណ្ដាខេត្តផ្សេងៗចូលលេងល្បែងយ៉ាងគគ្រឹកគគ្រេង។ ផ្ដើមចេញពីល្បែងស៊ីសងនោះហើយទើបបច្ចុប្បន្ននៅក្នុងឃុំដាក់ដាំ និងបណ្ដាឃុំមួយចំនួនទៀតក្នុងស្រុកអូររាំង កើតមានបទល្មើសផ្សេងៗដូចជា អំពើចោរកម្មគួរឲ្យព្រួយបារម្ភធ្វើឲ្យប៉ះពាល់យ៉ាងខ្លាំងដល់សន្តិសុខសង្គម។ រហូតមកដល់ពេលនេះម្ចាស់កាស៊ីណូនៅភូមិដាក់ដាំ កំពុងបន្តបើកឲ្យពលរដ្ឋខ្មែរចូលលេងល្បែងយ៉ាងពេញបន្ទុកដោយមិនអនុវត្តន៍ឲ្យបានត្រឹមត្រូវទៅតាមច្បាប់នៃការបង្កើតកាស៊ីណូនោះទេ ចំណែកមន្ត្រីអាជ្ញាធរនិងសមត្ថកិច្ចក្នុងខេត្តមណ្ឌលគិរី នាំគ្នាសម្ងំស្ងាត់ឈឹង។
មជ្ឈដ្ឋាននានាបានលើកឡើងថា នៅក្នុងច្បាប់បង្កើតកាស៊ីណូមិនអនុញ្ញាតឲ្យជនជាតិខ្មែរចូលលេងល្បែងស៊ីសងនោះទេ គឺសម្រាប់តែជនបរទេសប៉ុណ្ណោះ ហើយម្ចាស់កាស៊ីណូណាបំពានច្បាប់ត្រូវប្រឈមនឹងការបិទអាជីវកម្មជាមិនខាន។ ប៉ុន្តែកាស៊ីណូនៅភូមិដាក់ដាំ ឃុំដាក់ដាំ ស្រុកអូររាំង ខេត្តមណ្ឌលគិរី បែរជាបើកឲ្យពលរដ្ឋខ្មែរចូលលេងល្បែងស៊ីសងយ៉ាងគឃ្លើន ហើយអ្នកខ្លះចាញ់អស់លុយកាក់ទ្រព្យសម្បត្តិរថយន្តម៉ូតូ ហើយឈានដល់កើតមានអំពើហិង្សាក្នុងគ្រួសារទៀតផង។ ដូច្នេះហើយទើបប្រជាពលរដ្ឋក្នុងឃុំដាក់ដាំ ស្រុកអូររាំង អំពាវនាវយ៉ាងទទូចឲ្យថ្នាក់ដឹកនាំក្រសួងមហាផ្ទៃ ក៏ដូចជានាយឧត្តមសេនីយ៍ នេត សាវឿន អគ្គស្នងការនគរបាលជាតិ ចាត់វិធានការបង្ក្រាបល្បែងស៊ីសងក្នុងកាស៊ីណូនៅភូមិដាក់ដាំ ជាបន្ទាន់ ព្រោះលោក ស្វាយ សំអ៊ាង អភិបាលខេត្តមណ្ឌលគិរី និងលោកឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរី នាំគ្នាដេកលក់ធ្វើមិនដឹងមិនឮអ្វីទាំងអស់។(មានត)
