ប្រភពពីសមត្ថកិច្ចពាក់ព័ន្ធនៅក្នុងខេត្តត្បូងឃ្មុំ បានឲ្យដឹងថា មានក្រុមហ៊ុនរបស់ឈ្មួញធំៗ៤នាក់កំពុងបង្កើនសកម្មភាពនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់ព្រោះមានការឃុបឃិតពីមន្ត្រីជំនាញនិងសមត្ថកិច្ចនៅច្រកព្រំដែន។ ឈ្មួញទាំងនោះមានដូចជា យាយញាប់, ឈ្មួញឈ្មោះ មាស ម៉ាណែត, ឈ្មួញឈ្មោះ សេង ទី និងឈ្មួញជាមន្ត្រីយោធាពាក់ផ្កាយ៣ ដែលមានអំណាចខ្លាំងល្បីខាងនាំចូលទំនិញគេចពន្ធ ទំនិញបង់ពន្ធមិនគ្រប់ច្រើនឆ្នាំមកហើយ។ ក្នុងមួយថ្ងៃៗយ៉ាងតិចមានឈ្មួញដឹកជញ្ជូនទំនិញពីប្រទេសចិន និងប្រទេសយួន ឆ្លងដែនចូលមកប្រទេសកម្ពុជាតាមច្រកព្រំដែនជាច្រើនកន្លែង ដោយប្រើរថយន្តកុងតឺន័រនិងរថយន្តធុនធំប្រមាណពី៣០០ទៅ៣៥០គ្រឿង ហើយបង់ពន្ធត្រឹម៣៥ទៅ៤០ភាគរយប៉ុណ្ណោះ។
ប្រភពពីមន្ត្រីពាក់ព័ន្ធនៅច្រកព្រំដែនជាច្រើនកន្លែងក្នុងខេត្តត្បូងឃ្មុំ បានបង្ហើបឲ្យដឹងថា បច្ចុប្បន្នមានឈ្មួញធំៗច្រើននាក់សម្រុកនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់តាមច្រកព្រំដែនក្នុងស្រុកមេមត់ និងស្រុកពញាក្រែក យ៉ាងសុខស្រួលធ្វើឲ្យរដ្ឋត្រូវខាតបង់ចំណូលពន្ធយ៉ាងច្រើនសន្ធឹកសន្ធាប់ក្នុងមួយខែៗ។ បើតាមសមត្ថកិច្ចពាក់ព័ន្ធនៅក្នុងខេត្តត្បូងឃ្មុំ បានបង្ហើបឲ្យដឹងថា ឈ្មួញខ្លះមានទំនាក់ទំនងជិតស្និទ្ធជាមួយមេគយធំៗក្នុងអគ្គនាយកដ្ឋានគយនិងរដ្ឋាករកម្ពុជា ទើបសមត្ថកិច្ចនៅតាមច្រកព្រំដែនខេត្តត្បូងឃ្មុំ បង្ខំចិត្តសម្រួលឲ្យពួកគេដឹកជញ្ជូនទំនិញពីប្រទេសចិន និងប្រទេសយួន ឆ្លងកាត់ច្រកព្រំដែនចូលមករាជធានីភ្នំពេញ យ៉ាងពេញបន្ទុក។ បញ្ហានេះគឺជារឿងដែលលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ មិនគួរបណ្ដែតបណ្ដោយតទៅទៀតទេ ព្រោះមួយរយៈចុងក្រោយនេះឈ្មួញធំៗនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់តាមច្រកព្រំដែនជាច្រើនកន្លែងនៅខេត្តត្បូងឃ្មុំ កាន់តែច្រើនឡើងៗ។
ប្រភពដែលស្និទ្ធនឹងឈ្មួញធំៗដែលនាំចូលទំនិញតាមច្រកព្រំដែនក្នុងស្រុកមេមត់ និងស្រុកពញាក្រែក បានឲ្យដឹងថា ក្រុមឈ្មួញទាំងនោះមានខ្នងបង្អែករឹងមាំនៅក្នុងអគ្គនាយកដ្ឋានគយនិងរដ្ឋាករកម្ពុជា ហេតុនេះសមត្ថកិច្ចពាក់ព័ន្ធនៅច្រកព្រំដែន បានត្រឹមជួយសម្រួលឲ្យពួកគេដឹកជញ្ជូនទំនិញទៅដល់គោលដៅតែប៉ុណ្ណោះ។ ក្នុងនោះឈ្មួញខ្លះបង់ពន្ធតាមរបៀបម៉ៅការហើយក៏មានការឃុបឃិតកែឯកសារបន្លំប្រភេទទំនិញផងដែរ ព្រោះឈ្មួញធំៗសុទ្ធតែមានបទពិសោធន៍ក្នុងការរកស៊ីនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់ច្រើនឆ្នាំមកហើយ។ ទន្ទឹមនឹងនេះសមត្ថកិច្ចនៅតាមដងផ្លូវ ជាពិសេសក្រុមគយចល័តក៏មិនហ៊ានប៉ះពាល់ឈ្មួញធំៗទាំងនោះដែរ ព្រោះពួកគេចេះបែងចែកផលប្រយោជន៍តាមលំដាប់លំដោយជាប្រចាំដើម្បីឲ្យជំនួញរបស់ពួកគេដំណើរការយ៉ាងសុខស្រួល។ ហេតុនេះលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ មិនគួរមើលរំលងភាពមិនប្រក្រតីដែលកើតឡើងនៅតាមច្រកព្រំដែនក្នុងខេត្តត្បូងឃ្មុំ នោះទេព្រោះមួយរយៈចុងក្រោយនេះក្រុមឈ្មួញធំៗកំពុងតែសម្រុកនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់កាន់តែច្រើនឡើងៗធ្វើឲ្យរដ្ឋខាតបង់ចំណូលពន្ធរដ្ធ។(មានត)
