ប្រជាពលរដ្ឋដែលធ្វើដំណើរឆ្លងកាត់ផ្លូវជាតិលេខ២ ស្រុកកណ្ដាលស្ទឹង ខេត្តកណ្ដាល បានកត់សម្គាល់ថា នៅលើកំណាត់ផ្លូវនេះមានស្ពានបាក់ស្រុតហើយផ្លូវត្រូវខូចជាបន្តបន្ទាប់ ព្រោះមានរថយន្តធុនធំដឹកទំនិញផ្ទុកលើសទម្ងន់បើកបរឆ្លងកាត់ទាំងយប់ទាំងថ្ងៃ។ ជាពិសេសរថយន្តដឹកដី ដឹកខ្សាច់ ដឹកថ្ម ផ្ទុកលើសទម្ងន់អាចបើកបរឆ្លងកាត់កំណាត់ផ្លូវជាតិលេខ២ ក្នុងស្រុកកណ្ដាលស្ទឹង យ៉ាងរលូនឲ្យតែម្ចាស់រថយន្តទាំងនោះបង់លុយតាមការកំណត់របស់ក្រុមមន្ត្រីប្រចាំស្ថានីយ៍ជញ្ជីងថ្លឹងរថយន្តទាំង២កន្លែង។ ក្រុមឈ្មួញនិងអាជីវកររកស៊ីដឹកជញ្ជូនទំនិញតាមរថយន្តធុនធំឆ្លងកាត់ផ្លូវជាតិលេខ២ បានឲ្យដឹងថា ឲ្យតែពួកគេបង់លុយតាមការកំណត់របស់ក្រុមមន្ត្រីប្រចាំស្ថានីយ៍ជញ្ជីងថ្លឹងរថយន្តទាំង២កន្លែងនៅស្រុកកណ្ដាលស្ទឹង គឺមិនបាច់ចូលថ្លឹងឲ្យបានត្រឹមត្រូវតាមបទដ្ឋានបច្ចេកទេសនោះឡើយ។ មានការរិះគន់ចំៗថា ក្រុមមន្ត្រីប្រចាំស្ថានីយ៍ជញ្ជីងថ្លឹងរថយន្តទាំង២កន្លែងលើផ្លូវជាតិលេខ២ ស្រុកកណ្ដាលស្ទឹង គិតតែពីរឿងប្រមូលលុយតាមរបៀបពុករលួយយ៉ាងគឃ្លើនបំផុត ព្រោះមានការឃុបឃិតបើកដៃពីសំណាក់លោក ម៉ឹង យូឡេង ប្រធានមន្ទីរសាធាណការខេត្តកណ្ដាល ដែលជាចៅហ្វាយនាយរបស់ពួកគេរួចទៅហើយ។
ប្រភពពីមន្ត្រីរាជការនៅក្នុងមន្ទីរសាធារណការនិងដឹកជញ្ជូនខេត្តកណ្ដាល បានឲ្យដឹងថា ស្ថានីយ៍ជញ្ជីងថ្លឹងរថយន្តលើផ្លូវជាតិលេខ២ ចំនួន២កន្លែងគឺជាប្រភពចំណូលដ៏សំខាន់របស់លោក ម៉ឹង យូឡេង ប្រធានមន្ទីរសាធារណការនិងដឹកជញ្ជូនខេត្តកណ្ដាល ព្រមទាំងបក្ខពួក។ ដូច្នេះហើយទើបប្រធានស្ថានីយ៍ជញ្ជីងថ្លឹងរថយន្តលើផ្លូវជាតិលេខ២ ក្នុងស្រុកកណ្ដាលស្ទឹង ខេត្តកណ្ដាល ទាំង២កន្លែងហ៊ានប្រែក្លាយជញ្ជីងថ្លឹងរថយន្តទៅជាជញ្ជីងថ្លឹងលុយយ៉ាងសុខស្រួល ហើយបណ្ដោយរថយន្តធុនធំផ្ទុកលើសទម្ងន់អាចបើកបរឆ្លងកាត់ផ្លូវជាតិលេខ២ ក្នុងស្រុកកណ្ដាលស្ទឹង យ៉ាងពេញបន្ទុក។ ចំណែកលោក ស៊ុន ចាន់ថុល ដែលជារដ្ឋមន្ត្រីក្រសួងសាធារណការនិងដឹកជញ្ជូន ក៏ដូចជាលោក សេង ឈួន មេជញ្ជីងថ្លឹងរថយន្តទូទាំងប្រទេស កំពុងរក្សាភាពស្ងៀមស្ងាត់ហើយបណ្ដោយឲ្យលោក ម៉ឹង យូឡេង ប្រធានមន្ទីរសាធារណការខេត្តកណ្ដាល ឃុបឃិតឲ្យមន្ត្រីក្រោមឱវាទធ្វើអ្វីៗតាមអំពើចិត្តតែម្តង។
ក្រុមឈ្មួញនិងអាជីវករដែលដឹកជញ្ជូនទំនិញតាមរថយន្តធុនធំឆ្លងកាត់ផ្លូវជាតិលេខ២ ក្នុងស្រុកកណ្ដាលស្ទឹង ខេត្តកណ្ដាល បានឲ្យដឹងថា ទោះបីពួកគេដឹកទំនិញផ្ទុកលើសទម្ងន់ឬមិនលើសទម្ងន់ក៏ដោយ ឲ្យតែបង់លុយតាមការកំណត់របស់ប្រធានស្ថានីយ៍ជញ្ជីងថ្លឹងរថយន្តផ្លូវជាតិលេខ២ ចំណុចភូមិត្រពាំងក្រសាំង ឃុំជើងកើប និងចំណុចផ្លូវជាតិលេខ២ ឃុំព្រះពុទ្ធ ស្រុកកណ្ដាលស្ទឹង គឺអាចបន្តដំណើរទៅមុខយ៉ាងសុខស្រួលជាមិនខាន។ ប្រធានស្ថានីយ៍ជញ្ជីងថ្លឹងរថយន្តលើផ្លូវជាតិលេខ២ទាំង២កន្លែងក្នុងស្រុកកណ្ដាលស្ទឹង ខេត្តកណ្ដាល តែងយកឈ្មោះលោក ម៉ឹង យូឡេង ប្រធានមន្ទីរសាធារណការនិងដឹកជញ្ជូនខេត្តកណ្ដាល មកទន្ទេញជាប់មាត់ដើម្បីការពារទង្វើមិនប្រក្រតីរបស់ពួកគេយ៉ាងក្រអឺតក្រទម។ ដូច្នេះហើយទើបមានសេចក្ដីអំពាវនាវឲ្យលោក ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន ពិនិត្យឡើងវិញខ្លះផងព្រោះលោក ម៉ឹង យូឡេង កំពុងបណ្ដោយឲ្យមន្ត្រីក្រោមឱវាទធ្វើអ្វីៗតាមអំពើចិត្តដើម្បីជាថ្នូរនឹងផលប្រយោជន៍។(មានត)
