ប្រភពដែលស្និទ្ធនឹងលោក ជុំ សំនិត បានឲ្យដឹងថា មួយរយៈចុងក្រោយនេះរឿងអាស្រូវច្រើនបែបច្រើនយ៉ាងរបស់លោក ជុំ សំនិត ត្រូវបានលាតត្រដាងជាបន្តបន្ទាប់ ប៉ុន្តែលោក គង់ វិបុល ដែលជាអគ្គនាយកនៃអគ្គនាយកដ្ឋានពន្ធដារ ធ្វើមិនដឹងមិនឮអ្វីទាំងអស់។ សូម្បីតែលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ក៏រក្សាភាពស្ងៀមស្ងាត់ជុំវិញរឿងអាស្រូវពុករលួយនិងទង្វើមិនប្រក្រតីរបស់លោក ជុំ សំនិត នោះដែរ ដូច្នេះហើយទើបលោក ជុំ សំនិត មានឥទ្ធិពលកាន់តែខ្លាំងក្លាក្នុងការប្រព្រឹត្តអំពើពុករលួយ។ ដោយសារអាងមានខ្នងបង្អែករឹងមាំទើបលោក ជុំ សំនិត ហ៊ានយករថយន្តរបស់អង្គភាពដឹកទំនិញគេចពន្ធពីច្រកអូរស្មាច់ ជាពិសេសគ្រឿងស្រវឹងទៅរាជធានីភ្នំពេញ យ៉ាងក្រអឺតក្រទមមិនខ្វល់ពីការរិះគន់អ្វីទាំងអស់។
ប្រភពពីមន្ត្រីរាជការនៅក្នុងអង្គភាពសាខាពន្ធដារខេត្តឧត្ដរមានជ័យ បានឲ្យដឹងថា បច្ចុប្បន្នលោក ជុំ សំនិត ប្រធានសាខាពន្ធដារខេត្តឧត្ដរមានជ័យ នៅតែបន្តប្រើអំណាចប្រព្រឹត្តអំពើពុករលួយច្រើនបែបច្រើនយ៉ាងដោយគ្មានញញើតអ្វីទាំងអស់ ជាពិសេសទាក់ទងទៅនឹងការប្រមូលលុយ។ ការដែលលោក ជុំ សំនិត ហ៊ានធ្វើអ្វីៗតាមអំពើចិត្ត ហើយប្រព្រឹត្តអំពើពុករលួយបក្ខពួកនិយមគ្រួសារនិយមយ៉ាងពេញទំហឹង គឺដោយសារអាងមានខ្នងបង្អែករឹងមាំនៅក្នុងអគ្គនាយកដ្ឋានពន្ធដារ ក៏ដូចជានៅក្នុងក្រសួងសេដ្ឋកិច្ច និងហិរញ្ញវត្ថុ។ ជាក់ស្ដែងរាល់ពេលដែលរឿងអាស្រូវនិងអំពើពុករលួយរបស់លោក ជុំ សំនិត ត្រូវបានបណ្ដាញព័ត៌មាននានាចុះផ្សាយជាសាធារណៈ គឺលោក ជុំ សំនិត តែងតែយកឈ្មោះលោក គង់ វិបុល អគ្គនាយកនៃអគ្គនាយកដ្ឋានពន្ធដារ និងយកឈ្មោះ លោក អូន ព័ន្ធមុនីរ័ត្ន រដ្ឋមន្ត្រីក្រសួងហិរញ្ញវត្ថុ មកប្រើយ៉ាងងងើលតែម្តង។
ជុំវិញបញ្ហាខាងលើនេះមន្ត្រីរាជការនៅក្នុងអង្គភាពសាខាពន្ធដាខេត្តឧត្ដរមានជ័យ បានអំពាវនាវឲ្យលោក គង់ វិបុល អគ្គនាយកនៃអគ្គនាយកដ្ឋានពន្ធដារ ក៏ដូចជាលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ចាត់វិធានការទប់ស្កាត់អំពើពុករលួយរបស់លោក ជុំ សំនិត និងបក្ខពួកខ្លះផង។ មន្ត្រីរាជការក្នុងអង្គភាពសាខាពន្ធដារខេត្តឧត្ដរមានជ័យ បានលាតត្រដាងថា ក្រៅពីប្រើតួនាទីនិងអំណាចប្រព្រឹត្តអំពើពុករលួយច្រើនបែបច្រើនយ៉ាង គឺលោក ជុំ សំនិត តែងប្រើរថយន្តរបស់អង្គភាពទៅដឹកស្រាបៀរនិងដឹកគ្រឿងសង្ហារឹមពីច្រកអូរស្មាច់ ទៅលក់នៅរាជធានីភ្នំពេញ យ៉ាងរលូន។ លើសនេះទៅទៀតលោក ជុំ សំនិត តែងយកឈ្មោះលោក គង់ វិបុល និងយកឈ្មោះ លោក អូន ព័ន្ធមុនីរ័ត្ន មកទន្ទេញជាប់មាត់ដើម្បីគំរាមកំហែងមន្ត្រីនៅក្នុងអង្គភាពសាខាពន្ធដារខេត្តឧត្ដរមានជ័យហើយអួតអាងថាក្រៅពីលោក គង់ វិបុល និងលោក អូន ព័ន្ធមុនីរ័ត្ន គឺខ្លួនគ្មានខ្លាចនរណាទាំងអស់។(មានត)
