ខេត្តកំពត ៖ សេចក្តីរាយការណ៍ពីខេត្តកំពត បានឲ្យដឹងថា ជញ្ជីងថ្លឹងរថយន្តចំនួន ២កន្លែង នៅខេត្តកំពតទី១ មានទីតាំងស្ថិតនៅឃុំតានី ស្រុកអង្គរជ័យ ទី២ មានទីតាំងស្ថិតនៅ ឃុំកោះតូច ស្រុកទឹកឈូ ដោយក្រុមជញ្ជីង ថ្លឹងរថយន្តទាំង ២ កន្លែងនេះ ដឹកនាំដោយលោក ពេជ្រ រដ្ឋា ជាអនុប្រធានមន្ទីរ សាធារណការនិងដឹកជញ្ជូន ខេត្តកំពត ជាអ្នកទទួលខុសត្រូវ។ កន្លងមកក្រុមជញ្ជីងទាំង ២ទីតាំងនេះ គេមិនសូវឃើញចាប់ឃាត់ រថយន្តដឹកជញ្ជូនធុនធ្ងន់ថ្លឹងទេ ប៉ុន្តែគេ ឃើញក្រុមតៃកុងរថយន្ត នៅពេលបើកឆ្លងកាត់ ទីតាំងជញ្ជីងនោះ ឈប់រថយន្តតកន្ទុយគ្នា ខ្លះចូលទៅកត់ឈ្មោះ រថយន្តឆ្លងកាត់ ដើម្បីទុកទូទាត់លុយប្រចាំខែ ចំពោះអ្នកដែលដឹកជញ្ជូនទៅមកប្រចាំថ្ងៃ ចំណែកអ្នកដែលយូៗ ត្រូវបើកឆ្លងកាត់ម្តង គឺត្រូវបង់លុយភ្លាមៗទៅឲ្យ កូនចៅរបស់លោក ពេជ្រ រដ្ឋា។
ការប្រព្រឹត្តអំពើខុសច្បាប់ របស់ក្រុមជញ្ជីងខាងលើនោះ គឺមានការចូលរួមបើកភ្លើងខៀវ ពីសំណាក់ លោកអភិបានខេត្ត ខូយ ឃុនហួរ និងលោក លឹម សំបូរ ប្រធានមន្ទីរ សាធារណការនិងដឹកជញ្ជូន ផងដែរទើបអ្វីៗ អាចដំណើរការដោយរលូនល្អ។ ទាំងលោក ខូយ ឃុនហ៊ួរ និងលោក លឹម សំបូរ គេសង្ស័យថា ទទួលបានផលប្រយោជន៍ រាប់សិបលានរៀល ក្នុងមួយខែៗតាមរយៈការបិទភ្នែក បិទត្រចៀក ឲ្យក្រុមជញ្ជីងថ្លឹងរថយន្ត របស់លោក ពេជ្រ រដ្ឋា ធ្វើអ្វីៗតាមតែអំពើចិត្ត។ ដោយសារតែមាន ការឃុបឃិតពីថ្នាក់លើ រហូតដល់ថ្នាក់ក្រោមនោះ បានធ្វើឲ្យ ក្រុមជញ្ជីងទាំង ២ កន្លែងនេះ ពីមួយថ្ងៃទៅមួយថ្ងៃ បង្កើនសកម្មភាពប្រមូលលុយ ពីរថយន្តដឹកជញ្ជូនទំនិញ គ្មានខ្លាចច្បាប់ទម្លាប់បន្តិចណាឡើយ។
ប្រធានមន្ទីរ លឹម សំបូរ ជាខ្នងបង្អែកយ៉ាងរឹងមាំ ដែលល្មមៗមិនអាច មាននរណាម្នាក់ ហ៊ានក្អកជាមួយគាត់ទេ។
ចំណែកក្រុមអ្នករកស៊ី ដឹកជញ្ជូនទំនិញ តាមរថយន្តធុនធ្ងន់បានអះអាងថា ក្រុមជញ្ជីងទាំង ២កន្លែងខាងលើនេះ ឲ្យតែអ្នករកស៊ីបង់លុយឲ្យពួកគេ ទៅតាមការទាមទារ ទោះជាដឹកទំនិញលើសទម្ងន់ប៉ុណ្ណា ក៏ពួកគេមិនថ្លឹងដែរ ប៉ុន្តែទោះជាដឹកទំនិញ មិនគ្រប់ចំណុះ ក៏ដោយឲ្យតែមិនបង់លុយ គឺត្រូវតែគេហៅថ្លឹង នាំឲ្យខាតពេលវេលា និងបង្ខំចិត្តត្រូវតែបង់លុយ ឲ្យពួកគេដដែលជៀសមិនផុត។ បញ្ហាជញ្ជីងថ្លឹងរថយន្តនេះ បើក្រសួងសាធារណការនិងដឹកជញ្ជូន ជាពិសេសអង្គភាព ប្រឆាំងអំពើពុករលួយ មិនចាត់វិធានការ តាមផ្លូវច្បាប់ទេនោះ ជញ្ជីងថ្លឹងរថយន្តទាំង ២ កន្លែងនេះ លែងហៅជាជញ្ជីងថ្លឹងរថយន្ត លើសចំណុះហើយ នឹងក្លាយទៅជាជញ្ជីងថ្លឹងលុយ និងថ្លឹងតៃកុងរថយន្ត នាំផ្លូវខូចកាន់តែធ្ងន់ធ្ងរ ហើយរដ្ឋត្រូវចំណាយលុយធ្វើផ្លូវឡើងវិញ មានការបំផ្លាញសេដ្ឋកិច្ចជាតិ ដោយសាតែអំពើពុករលួយ របស់លោក ពេជ្រ រដ្ឋា។
លោក ពេជ្រ រដ្ឋា នៅពេលទូទាត់លុយចែកថ្នាក់លើ និងថ្នាក់ក្រោម តែងតែមានអំណួតទៅកាន់ អ្នកផឹកស៊ីរួមតុថា គាត់មានមនុស្ស មានវាសនាខ្ពស់ រកស៊ីមិនហត់ តែរកចំណូលច្រកហោបៅផ្ទាល់ខ្លួន រាប់លានរៀលក្នុងមួយខែ ហើយមិនតែប៉ុណ្ណោះ លោក ពេជ្រ រដ្ឋា បាននិយាយក្អេងក្អាងថា សព្វថ្ងៃនេះ គាត់ខ្លាចតែចៅហ្វាយខេត្ត និងប្រធានមន្ទីររបស់គេតែ ២នាក់ ក្រៅពីនោះមិនខ្លាចនរណាទាំងអស់ បើមានស្ថាប័នណាមួយ ចង់ចាត់ការលើរឿងអំពើពុករលួយ ក៏លោក ពេជ្រ រដ្ឋា មិនខ្វល់ដែរ ព្រោះមានចៅហ្វាយខេត្ត និងប្រធានមន្ទីរ លឹម សំបូរ ជាខ្នងបង្អែកយ៉ាងរឹងមាំ ដែលល្មមៗមិនអាច មាននរណាម្នាក់ ហ៊ានក្អកជាមួយគាត់ទេ។
